Kottayam Medical College accident; Bindu’s son joins Travancore Devaswom Board
കോട്ടയം: കോട്ടയം മെഡിക്കല് കോളേജ് ആശുപത്രിയിലെ അപകടത്തില് മരിച്ച ബിന്ദുവിന്റെ മകന് നവനീത് സര്ക്കാര് ജോലിയില് പ്രവേശിച്ചു. തിരുവിതാംകൂര് ദേവസ്വം ബോര്ഡില് ഓവര്സിയര് ആയാണ് നവനീതിന് നിയമനം.
ദേവസ്വം മന്ത്രി വി എന് വാസവനൊപ്പം രാവിലെ എത്തിയാണ് നവനീത് ജോലിയില് പ്രവേശിച്ചത്. ബിന്ദുവിന്റെ അപകട മരണത്തിന് പിന്നാലെ സര്ക്കാര് പ്രഖ്യാപിച്ചതാണ് മകന് ജോലി നല്കാമെന്നത്.
എഞ്ചിനീയറിങ് ബിരുദ്ധധാരിയായ നവനീത് വിശ്രുതന് ദേവസ്വം ബോര്ഡില് നിയമനം നല്കുമെന്നായിരുന്നു പ്രഖ്യാപനം. അപകടം നടന്ന് മൂന്ന് മാസത്തിനുശേഷമാണ് നവനീത് ജോലിയില് പ്രവേശിക്കുന്നത്.
ദേവസ്വം ബോര്ഡ്, വൈക്കം അസിസ്റ്റന്റ് എന്ജിനീയറുടെ കാര്യാലയത്തിലാണ് നിയമനം.
സ്കൂളുകളില് പാഠ്യപദ്ധതി പരിഷ്കരണത്തിനൊരുങ്ങി വിദ്യാഭ്യാസ വകുപ്പ്
മുന്പ് ഒരു സ്വകാര്യ സ്ഥാപനത്തില് ജോലി ചെയ്തിരുന്ന നവനീത് ആദ്യത്തെ ശമ്പളവുമായി അമ്മയെ കാണാന് എത്തിയ ദിവസം ആണ് മെഡിക്കല് കോളേജിലെ കെട്ടിടം പൊളിഞ്ഞുവീണ് ബിന്ദു മരിച്ചത്.
ഉന്നത വിദ്യാഭ്യാസ വകുപ്പിലെ നാഷണല് സര്വീസ് സ്കീം യൂണിറ്റ് ബിന്ദുവിന്റെ കുടുംബത്തിന് വീട് നിര്മ്മിച്ചു നല്കിയിരുന്നു. കഴിഞ്ഞാഴ്ച അതിന്റെ താക്കോലും നല്കി. ബിന്ദുവിന്റെ മകള് നവമിയുടെ ചികിത്സാ ചെലവ് പൂര്ണമായും സര്ക്കാര് ഏറ്റെടുത്തിട്ടുണ്ട്.
സര്ക്കാര് ബിന്ദുവിന്റെ കുടുംബത്തിനൊപ്പം നിന്ന് അവരുടെ ആവശ്യങ്ങളെല്ലാം സമയബന്ധിതമായി നടപ്പാക്കികൊടുത്തുവെന്നും തുടര്ന്നും സര്ക്കാര് കൂടെയുണ്ടാകുമെന്നും മന്ത്രി വിഎന് വാസവന് പറഞ്ഞു.
ഇത്തരമൊരു അവസ്ഥയില് തങ്ങളെ ചേര്ത്തുപിടിച്ച എല്ലാവരോടും നന്ദിയുണ്ടെന്ന് നവനീത് പറഞ്ഞു. ഇക്കഴിഞ്ഞ ജൂലൈ മൂന്നിനാണ് അധികൃതരുടെ അനാസ്ഥമൂലം മെഡിക്കല് കോളേജില് കെട്ടിടം പൊളിഞ്ഞുണ്ടായ അപകടത്തില് തലയോലപറമ്പ് സ്വദേശിയായ ബിന്ദുവിന് ജീവന് നഷ്ടപ്പെട്ടത്.
