പാലക്കാട്: പാലക്കാട് കെഎസ്ആർടിസി ഡിപ്പോയിൽ നിർത്തിയിട്ടിരുന്ന ബസ് അജ്ഞാതൻ മോഷ്ടിച്ച് കടത്തിക്കൊണ്ടുപോയി. ഞായറാഴ്ച പുലർച്ചെ അഞ്ച് മണിയോടെയാണ് സംഭവം നടന്നത്. ഡിപ്പോയിൽ എത്തിയ മോഷ്ടാവ് ബസ് സ്റ്റാർട്ട് ചെയ്ത് നഗരത്തിലേക്ക് ഓടിച്ചുപോകുകയായിരുന്നു.
ബസ് കൊണ്ടുപോകുന്നത് ശ്രദ്ധയിൽപ്പെട്ട ജീവനക്കാർ പിന്നാലെ പോയതോടെ മോഷ്ടാവ് നഗരത്തിലെ മംഗളം ടവറിന് സമീപത്ത് വാഹനം ഉപേക്ഷിച്ച് രക്ഷപ്പെട്ടു. ഡിപ്പോയിൽ നിന്ന് ഏകദേശം ഒരു കിലോമീറ്റർ ദൂരം ബസ് ഓടിച്ച മോഷ്ടാവ് യാത്രയ്ക്കിടെ പല സ്ഥലങ്ങളിലും വാഹനമിടിച്ചെന്നാണ് വിവരം.
സംഭവത്തിൽ പാലക്കാട് ടൗൺ പൊലീസ് കേസെടുത്ത് അന്വേഷണം ആരംഭിച്ചു. ബസ് മോഷ്ടിച്ചയാളെ ഇതുവരെ തിരിച്ചറിഞ്ഞിട്ടില്ല. അതേസമയം, ഡിപ്പോയിൽ നിർത്തിയിട്ടിരുന്ന ബസ് ആർക്കും എളുപ്പത്തിൽ എടുത്ത് കൊണ്ടുപോകാൻ കഴിയുന്ന സാഹചര്യമുണ്ടായിരുന്നോ എന്ന ചോദ്യവുമായി കെഎസ്ആർടിസിക്കെതിരെ വിമർശനവും ശക്തമായിട്ടുണ്ട്.
