തിരുവനന്തപുരം: സംസ്ഥാനത്തെ 12 ജില്ലകളിലെ 38 തദ്ദേശ സ്വയംഭരണ വാർഡുകളിലേക്ക് നടന്ന ഉപതെരഞ്ഞെടുപ്പിന്റെ വോട്ടെണ്ണൽ ആരംഭിച്ചു. 126 സ്ഥാനാർഥികളാണ് വിവിധ വാർഡുകളിലായി ജനവിധി തേടിയത്.

ഉപതെരഞ്ഞെടുപ്പിൽ ആകെ 58.81 ശതമാനം പോളിംഗ് രേഖപ്പെടുത്തി. ജില്ലകളിൽ ഏറ്റവും ഉയർന്ന പോളിംഗ് കണ്ണൂർ ജില്ലയിലാണ്. ഏറ്റവും കുറവ് പോളിംഗ് കോട്ടയം ജില്ലയിലാണ് രേഖപ്പെടുത്തിയത്.

കൊച്ചി, കോഴിക്കോട് കോർപ്പറേഷനുകളിലെ ഓരോ വാർഡുകൾക്ക് പുറമെ മട്ടന്നൂർ, ചിറ്റൂർ-തത്തമംഗലം, ചാലക്കുടി നഗരസഭകളിലെ ഓരോ വാർഡുകളിലും ഉപതെരഞ്ഞെടുപ്പ് നടന്നു. തിരുവനന്തപുരം, കോട്ടയം, പാലക്കാട് ജില്ലകളിലായി ഏഴ് ബ്ലോക്ക് പഞ്ചായത്ത് വാർഡുകളിലും 23 ഗ്രാമ പഞ്ചായത്ത് വാർഡുകളിലും വോട്ടെടുപ്പ് നടന്നു.