കൊച്ചി: നടിയെ ആക്രമിച്ച കേസില് വിധി പറഞ്ഞ വിചാരണക്കോടതിയെ അധിക്ഷേപിച്ച് മാധ്യമങ്ങളോട് പ്രതികരിച്ചയാള്ക്കെതിരെ കേസെടുക്കാന് കോടതി നിര്ദേശം.
കേസില് കുറ്റവിമുക്തനാക്കപ്പെട്ട നടന് ദിലീപ് കോടതി മുറിയിലേക്ക് വന്നപ്പോള് ജഡ്ജി എഴുന്നേറ്റ് നിന്നുവെന്നടക്കം ആരോപണം ഉന്നയിച്ച ചാള്സ് ജോര്ജിനെതിരെയാണ് കേസെടുക്കാന് ഉത്തരവിട്ടത്.
എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി രണ്ടാണ് എറണാകുളം സെന്ട്രല് പൊലീസ് എസ്എച്ച്ഒയോട് കേസെടുക്കാന് ആവശ്യപ്പെട്ടത്. അഭിഭാഷകരായ രാഹുല് ശശിധരന് , ഗിജീഷ് പ്രകാശ് എന്നിവര് മുഖേനേ പി.ജെ പോള്സണ് നല്കിയ പരാതിയിലാണ് ഉത്തരവ്.
നടി ആക്രമിക്കപ്പെട്ട കേസുമായി ബന്ധപ്പെട്ട് ഇക്കഴിഞ്ഞ ഡിസംബര് എട്ടിനാണ് എറണാകുളം സെഷന്സ് കോടതി വിധി പ്രസ്താവിച്ചത്. പിന്നാലെ എറണാകുളം ജില്ലാ കോടതി കോംപ്ലക്സിന് മുന്നില് വെച്ച് മാധ്യമങ്ങളോട് സംസാരിച്ച ചാള്സ് ജോര്ജ്ജ് ജഡ്ജിയെയും കോടതിയെയും അധിക്ഷേപിക്കുന്ന തരത്തില് സംസാരിച്ചുവെന്നാണ് പരാതിയില് ആരോപിക്കുന്നത്.
വിധിപറഞ്ഞ ദിവസം കോടതിയില് ഉണ്ടായിരുന്ന ആളാണ് താനെന്ന അവകാശവാദത്തോടെയായിരുന്നു പ്രതികരണം. വിധി പക്ഷപാതപരമാണെന്നും , പ്രതി കോടതിയില് വരുമ്പോള് ജഡ്ജ് ബഹുമാനപൂര്വ്വം എഴുന്നേറ്റ് നില്കാറുണ്ടെന്നും, വിധി നീചമാണെന്നും യഥാര്ത്ഥ പ്രതികള് രക്ഷപെട്ടു എന്നും ചാള്സ് ജോര്ജ് പ്രതികരിച്ചിരുന്നു. ഈ ആരോപണം ബോധപൂര്വ്വം പൊതുജനത്തെ പ്രകോപിപ്പിക്കാനും കോടതിയുടെ അന്തസിനെ തകര്ക്കാനും ലക്ഷ്യമിട്ടുള്ളതെന്നാണ് പരാതി.
