ബംഗളൂരു: കോറമംഗലയില് യുവതിയുടെ മൃതദേഹം ചാക്കിലാക്കി മാലിന്യ ട്രക്കില് തള്ളിയ സംഭവത്തില് പങ്കാളി അറസ്റ്റില്. ബംഗളൂരു ഹൂളിമാവ് സ്വദേശി ആശയാണ് (40) കൊല്ലപ്പെട്ടത്. സംഭവത്തില് പങ്കാളി അസം സ്വദേശി മുഹമ്മദ് ഷംശുദീനാണ് അറസ്റ്റിലായത്. ഞായറാഴ്ചയാണ് കോറമംഗലയിലെ മാലിന്യ ട്രക്കില് ചാക്കില് കെട്ടി ഉപേക്ഷിച്ച നിലയില് സ്ത്രീയുടെ മൃതദേഹം കണ്ടെത്തിയത്. കൈകള് കെട്ടിയ നിലയിലായിരുന്നു. തുടര്ന്ന് പൊലീസ്, സിസിടിവി ദൃശ്യങ്ങള് കേന്ദ്രീകരിച്ചു നടത്തിയ അന്വേഷണത്തിനൊടുവിലാണ് ഷംശുദീനെ പിടികൂടിയത്.
വിവാഹമോചിതയായ ആശയും ഷംശുദീനും ലിവിങ് റിലേഷന്ഷിപ്പിലായിരുന്നു. ഭാര്യ ഭര്ത്താക്കന്മാരാണെന്നു പറഞ്ഞ് ഇരുവരും ബംഗളൂരുവില് വീട് വാടകയ്ക്കെടുത്തു താമസിക്കുകയായിരുന്നു. ഹൂളിമാവിലെ സ്വകാര്യ ഹൗസ്കീപ്പിങ് കമ്പനിയിലെ ജോലിക്കാരാണ് ഇവര്. വിവാഹിതനായ ഷംശുദീന്റെ ഭാര്യയും മക്കളും അസമിലാണ്.
സമീപകാലത്ത് ആശയും ഷംശുദീനും തമ്മിലുള്ള ബന്ധത്തില് വിള്ളലുണ്ടായിരുന്നുവെന്ന് പൊലീസ് പറയുന്നു. ആശയുടെ മദ്യപാനവും രാത്രി വൈകിയുള്ള ഫോണ് കോളുകളും ഷംശുദീനെ പ്രകോപിപ്പിച്ചു. ശനിയാഴ്ച രാത്രിയില് ഷംശുദീന് മദ്യപിച്ചെത്തുകയും തര്ക്കത്തിനു ശേഷം ആശയെ കഴുത്തറുത്ത് കൊലപ്പെടുത്തുകയുമായിരുന്നു. കൊലപാതക ശേഷം മൃതദേഹം ചാക്കിലാക്കി മാലിന്യ ട്രക്കില് തള്ളി. ബൈക്കില് ചാക്കുമായി പോകുന്നതിന്റെ സിസിടിവി ദൃശ്യങ്ങള് പുറത്തുവന്നതാണ് അന്വേഷണത്തില് നിര്ണായകമായത്.
