തിരുവനന്തപുരം: ഐപിഎസ് തലപ്പത്ത് വലിയ അഴിച്ചുപണികള് നടക്കാനിരിക്കെ ഉന്നത ഉദ്യോഗസ്ഥര്ക്കിടയില് ചരടുവലികള് സജീവമാകുന്നു. ഡിജിപി റാങ്ക് സ്ഥാനത്തിനായി നിരവധി ഉദ്യോഗസ്ഥര് രംഗത്തുണ്ടെന്നാണ് വിവരം.
നിതിന് അഗര്വാള് വിരമിക്കുന്നതോടെ ഡിജിപി റാങ്കില് ഒരു ഒഴിവ് വരും. സീനിയോറിറ്റിയില് എം.ആര്. അജിത് കുമാറാണ് മുന്നില്. എന്നാല് ആലപ്പുഴയിലെ ‘രക്ഷാപ്രവര്ത്തനം’ ഉള്പ്പെടെയുള്ള വിഷയങ്ങളില് വിമര്ശനം നേരിട്ടതിനാല് അദ്ദേഹത്തെ പരിഗണിക്കുമോ എന്നതില് സംശയം നിലനില്ക്കുന്നു.
തനിക്കെതിരെ ആസൂത്രിത നീക്കം നടക്കുന്നുവെന്നാണ് എം.ആര്. അജിത് കുമാറിന്റെ നിലപാട്. ബന്ധപ്പെട്ട സംഭവങ്ങളെക്കുറിച്ചുള്ള വാര്ത്തകള് ഇതിന്റെ ഭാഗമാണെന്നും അദ്ദേഹം അഭിപ്രായപ്പെട്ടിട്ടുണ്ട്. ക്രമസമാധാന ചുമതലയുള്ള എഡിജിപി സ്ഥാനത്ത് എച്ച്. വെങ്കിടേഷ് തുടരുന്നതില് സര്ക്കാരിന് താല്പര്യമില്ലെന്ന വിവരവും പുറത്തുവരുന്നു. പകരം ദിനേന്ദ്ര കശ്യപ്പോ പി. വിജയനോ എന്നതില് ആശയക്കുഴപ്പം തുടരുകയാണ്.
എസ്പി ഷൗക്കത്തലി തിരുവനന്തപുരം ജില്ലാ പൊലീസ് മേധാവിയാകാനിടയുണ്ടെന്നും റിപ്പോര്ട്ടുകളുണ്ട്. തിരുവനന്തപുരം, കൊച്ചി പൊലീസ് കമ്മീഷണര്മാരിലും മാറ്റങ്ങള് സാധ്യതയുണ്ടെന്ന് സൂചനയുണ്ട്. ഐപിഎസ് തലപ്പത്തെ അഴിച്ചുപണി സംബന്ധിച്ച് മുഖ്യമന്ത്രിയും ആഭ്യന്തര മന്ത്രിയും ഉടന് ചര്ച്ച നടത്തുമെന്നാണ് വിവരം.
ഇതിന് മുമ്പ് സംസ്ഥാനത്ത് ഐഎഎസ് തലപ്പത്തും വലിയ മാറ്റങ്ങള് നടന്നിരുന്നു. സസ്പെന്ഷനിലായിരുന്ന ബി. അശോകിനെയും എന്. പ്രശാന്തിനെയും പുതിയ ചുമതലകളിലേക്ക് നിയമിച്ചിരുന്നു. ദിവ്യ എസ്. അയ്യരെ വിഴിഞ്ഞം തുറമുഖ എംഡി സ്ഥാനത്ത് നിന്ന് മാറ്റി തദ്ദേശ വകുപ്പില് പ്രിന്സിപ്പല് ഡയറക്ടറായും നിയമിച്ചിരുന്നു.
