കൊച്ചി: തിരുവനന്തപുരം മെട്രോ പദ്ധതിയുടെ നടപടികൾ വൈകുന്നു. കൊച്ചി മെട്രോ തയ്യാറാക്കി നൽകിയ സമഗ്ര ഗതാഗത പദ്ധതി (CMP) സംസ്ഥാന സർക്കാർ അംഗീകരിച്ചില്ല. കേന്ദ്ര മാനദണ്ഡങ്ങൾ അനുസരിച്ച് സിഎംപി പുതുക്കണമെന്ന് ഗതാഗത വകുപ്പ് കൊച്ചി മെട്രോയോട് ആവശ്യപ്പെട്ടു.

കേന്ദ്ര നിയമപ്രകാരം 20 ലക്ഷം ജനസംഖ്യയുള്ള നഗരങ്ങളിലാണ് മെട്രോ പദ്ധതിക്ക് അനുമതി നൽകുന്നത്. എന്നാൽ തിരുവനന്തപുരം മെട്രോയ്ക്കായി കൊച്ചി മെട്രോ തയ്യാറാക്കിയ സിഎംപിയിൽ ആവശ്യമായ ജനസംഖ്യാ കണക്ക് ഇല്ലെന്നാണ് സർക്കാർ നിലപാട്.

ഇതേത്തുടർന്നാണ് സിഎംപി പുതുക്കി നൽകാൻ കൊച്ചി മെട്രോയോട് സർക്കാർ നിർദേശിച്ചത്. കഴിഞ്ഞ വർഷം ഡിസംബർ മുതൽ പുതുക്കിയ സിഎംപി നൽകണമെന്ന് ആവശ്യപ്പെട്ടിരുന്നെങ്കിലും കൊച്ചി മെട്രോ ഇതുവരെ സമർപ്പിച്ചിട്ടില്ല. സിഎംപി പുതുക്കി സമർപ്പിക്കാത്തത് തിരുവനന്തപുരം മെട്രോ പദ്ധതിയുടെ തുടർനടപടികൾ വൈകാൻ കാരണമാകുകയാണ്.