കുവൈത്ത് സിറ്റി: കുവൈത്തിലെ സുബ്ഹാൻ മേഖലയിൽ ഉണ്ടായ വാഹനാപകടവും തുടർന്നുണ്ടായ തീപിടിത്തവും രണ്ട് പേരുടെ ജീവനെടുത്തു. ഞായറാഴ്ച പുലർച്ചെയുണ്ടായ അപകടത്തിൽ നിയന്ത്രണം വിട്ട ഒരു വാഹനം മറിഞ്ഞ ശേഷം സമീപത്ത് പാർക്ക് ചെയ്തിരുന്ന നിരവധി ബസുകളിലേക്ക് ഇടിച്ചുകയറുകയായിരുന്നു.
അപകടത്തെ തുടർന്ന് വാഹനങ്ങളിൽ തീപിടിക്കുകയും തീ അതിവേഗം സമീപത്തുണ്ടായിരുന്ന ബസുകളിലേക്കും പടരുകയും ചെയ്തു. ഒന്നിലധികം വാഹനങ്ങൾ തീയിൽ നശിച്ചതായി അധികൃതർ അറിയിച്ചു.
വിവരം ലഭിച്ചതിനെ തുടർന്ന് സുബ്ഹാൻ ഫയർ സ്റ്റേഷനിൽ നിന്നുള്ള അഗ്നിശമനസേന ഉടൻ സ്ഥലത്തെത്തി രക്ഷാപ്രവർത്തനം ആരംഭിച്ചു. മണിക്കൂറുകൾ നീണ്ട പരിശ്രമത്തിനൊടുവിൽ തീ നിയന്ത്രണവിധേയമാക്കി പൂർണമായും അണയ്ക്കാൻ സാധിച്ചു. ഇതിലൂടെ കൂടുതൽ വലിയ ദുരന്തം ഒഴിവാക്കാനായതായും അധികൃതർ വ്യക്തമാക്കി.
അപകടത്തിൽ രണ്ട് പേർ മരിച്ചതായി അഗ്നിശമനസേന സ്ഥിരീകരിച്ചു. മറ്റ് ആളുകൾക്ക് പരിക്കേറ്റതായി റിപ്പോർട്ടുകളില്ല. സുരക്ഷാ നടപടികൾ പൂർത്തിയാക്കിയ ശേഷം അപകടസ്ഥലം തുടർ അന്വേഷണത്തിനായി ബന്ധപ്പെട്ട വകുപ്പുകൾക്ക് കൈമാറി.
അപകടത്തിന്റെ യഥാർത്ഥ കാരണവും തീപിടിത്തത്തിലേക്ക് നയിച്ച സാഹചര്യങ്ങളും കണ്ടെത്തുന്നതിനായി ബന്ധപ്പെട്ട അധികൃതർ വിശദമായ അന്വേഷണം ആരംഭിച്ചിട്ടുണ്ട്.
