അബുദാബി: ഹോർമുസ് പ്രതിസന്ധിയൊഴിവാക്കാൻ ഹോർമുസ് കടലിടുക്ക് ഒഴിവാക്കി എണ്ണ കയറ്റുമതി സുഗമമാക്കാൻ യുഎഇ പുതിയ പൈപ്പ്‌ലൈൻ നിർമ്മാണം വേഗത്തിലാക്കുന്നു. അബുദാബി നാഷണൽ ഓയിൽ കമ്പനി വെള്ളിയാഴ്ച സംഘടിപ്പിച്ച എക്‌സിക്യൂട്ടീവ് യോഗത്തിൽ, ആഗോള ആവശ്യങ്ങൾ നിറവേറ്റുന്നതിനായി വെസ്റ്റ്-ഈസ്റ്റ് പൈപ്പ്‌ലൈൻ പദ്ധതിയുടെ നിർമാണം വേഗത്തിലാക്കുമെന്ന് അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ പ്രഖ്യാപിച്ചു.

പൈപ്പ്‌ലൈൻ 2027 ഓടെ പ്രവർത്തനക്ഷമമാകുമെന്നും അറിയിച്ചിട്ടുണ്ട്. ലോകത്തിലെ എണ്ണയുടെ അഞ്ചിലൊന്നും കടന്നുപോയിരുന്ന ഹോർമുസ് കടലിടുക്കിലെ ഉപരോധവും, ഈ ജലപാതയിൽ ഇറാൻ നടപ്പിലാക്കിയ പുതിയ മാരിടൈം പ്രോട്ടോക്കോളും തടസ്സമില്ലാതെ നിലനിർത്താൻ ബദൽ വ്യാപാര മാർഗങ്ങൾ കണ്ടെത്താൻ ഗൾഫ് രാജ്യങ്ങൾ ഇപ്പോൾ നിർബന്ധിതരായിരിക്കുകയാണ്. ഇറാനെതിരെ അമേരിക്കയും ഇസ്രായേലും നടത്തുന്ന യുദ്ധം ലോകമെമ്പാടുമുള്ള ആഗോള ഊർജ്ജ വിതരണ ശൃംഖലയെ വലിയ രീതിയിൽ ബാധിച്ചിരുന്നു.