തൊടുപുഴ: സംസ്ഥാനത്ത് അൾട്രാവയലറ്റ് തീവ്രത ഏറ്റവും കൂടുതലായി രേഖപ്പെടുത്തിയത് മൂന്നാറിൽ. ദേശീയ ദുരന്തനിവാരണ അതോറിറ്റി നൽകിയ വിവരങ്ങൾ പ്രകാരം വ്യാഴാഴ്ച ഉച്ചയ്ക്ക് 11.16-ന് മൂന്നാറിൽ യു.വി. സൂചിക 9 ആയി ഉയർന്നു. കഴിഞ്ഞ ദിവസം വരെ ഇത് 8 ആയിരുന്നു. വീണ്ടും ഉയർന്നത് ആശങ്കയ്ക്കിടയാക്കുന്നു.

യു.വി. സൂചിക 11 ആയി ഉയർന്നാൽ മൂന്നാറിൽ റെഡ് അലർട്ട് പ്രഖ്യാപിക്കേണ്ടിവരും. അത്തരത്തിൽ പകൽ സമയത്ത് പുറത്തിറങ്ങുന്നതിന് നിയന്ത്രണങ്ങളും ഉണ്ടാകാൻ സാധ്യതയുണ്ട്. സൂര്യപ്രകാശത്തിൽ നിന്നുള്ള അൾട്രാവയലറ്റ് വികിരണത്തിന്റെ അളവാണ് യു.വി. സൂചിക. മൂന്നാർ ഉൾപ്പെടെ സംസ്ഥാനത്തെ നാല് പ്രദേശങ്ങൾ ഇപ്പോൾ ഓറഞ്ച് അലർട്ടിലാണ്. കോന്നി, ചെങ്ങന്നൂർ, ചങ്ങനാശ്ശേരി എന്നിവിടങ്ങളിൽ യു.വി. സൂചിക 8 ആയി തുടരുന്നു. കണ്ണൂരിലെ ധർമ്മടം പ്രദേശത്ത് മുമ്പ് 8 ആയിരുന്ന സൂചിക ഇപ്പോൾ 5 ആയി കുറഞ്ഞിട്ടുണ്ട്.

ഉയർന്ന അൾട്രാവയലറ്റ് കിരണങ്ങൾ ശരീരത്തെ ബാധിച്ചാൽ ചർമം പൊള്ളാനും കാഴ്ചയ്ക്ക് പ്രശ്നങ്ങൾ ഉണ്ടാകാനും സാധ്യതയുണ്ട്. മറ്റു ആരോഗ്യ പ്രശ്നങ്ങളും ഉണ്ടാകാമെന്ന് വിദഗ്ധർ മുന്നറിയിപ്പ് നൽകുന്നു. രാവിലെ 10 മുതൽ വൈകിട്ട് 3 വരെ നേരിട്ട് സൂര്യപ്രകാശം ഏൽക്കുന്ന ജോലികൾ ഒഴിവാക്കണമെന്നും ആവശ്യമായ സുരക്ഷാ മുൻകരുതലുകൾ എടുക്കണമെന്നും ദുരന്തനിവാരണ അതോറിറ്റി അറിയിച്ചു.

സംസ്ഥാനത്തെ 14 ജില്ലകളിലായി 14 കേന്ദ്രങ്ങളിൽ യു.വി. നിരീക്ഷണ സംവിധാനം സ്ഥാപിച്ചിട്ടുണ്ട്. ഉയർന്ന പ്രദേശങ്ങളിൽ കൂടുതലായി നിരീക്ഷണം നടത്തുന്നു. ഉച്ചസമയത്ത് സൂര്യൻ നേരെ മുകളിലായിരിക്കുമ്പോഴാണ് യു.വി. വികിരണം ഏറ്റവും കൂടുതലായി രേഖപ്പെടുത്തുന്നത്.