അമേരിക്കയിൽ കഴിഞ്ഞ ദിവസം നടന്ന മിഡ്‌ടേം തിരഞ്ഞെടുപ്പിൽ ഡൊണാൾഡ് ട്രംപിനും റിപ്പബ്ലിക്കൻ പാർട്ടിക്കും കനത്ത തിരിച്ചടിയാണ് നേരിടേണ്ടി വന്നത്. പതിറ്റാണ്ടുകളായി ജയിക്കാൻ കഴിയാതെയിരുന്ന സ്റ്റേറ്റുകളിൽ പോലും ഡെമോക്രാറ്റുകൾ വൻ മുന്നേറ്റമാണ് കാഴ്ചവെച്ചത്. അടുത്ത രണ്ട് വർഷം കൂടി ട്രംപ് തന്നെയായിരിക്കും പ്രസിഡന്റ് എങ്കിലും, അദ്ദേഹത്തിന്റെ അധികാരം പരിമിതപ്പെടും. ഇതുവരെ സ്വീകരിച്ചിരുന്നതുപോലെ ഏകപക്ഷീയമായി തീരുമാനങ്ങൾ എടുക്കാൻ ട്രംപിന് ഇനി സാധിക്കില്ല. ഈ രാഷ്ട്രീയ മാറ്റം നിലവിലുള്ള പശ്ചിമേഷ്യൻ യുദ്ധം ഉൾപ്പെടെയുള്ള ലോകരാഷ്ട്രങ്ങളുടെ നയങ്ങളിൽ വലിയ മാറ്റങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്. ഇന്ത്യയെയും യുഎസിലെ പ്രവാസി ഇന്ത്യക്കാരെയും ഈ രാഷ്ട്രീയ സാഹചര്യം എങ്ങനെ സ്വാധീനിക്കുമെന്ന് പരിശോധിക്കാം.

ഡെമോക്രാറ്റുകളിൽ നിന്ന് റിപ്പബ്ലിക്കൻ പാർട്ടിക്ക് നേരിടേണ്ടിവന്ന ഈ കനത്ത തിരിച്ചടി ഇന്ത്യ വളരെ ശ്രദ്ധയോടെയാണ് വീക്ഷിക്കുന്നത്. ജനപ്രതിനിധി സഭയിലും സെനറ്റിലും ഡെമോക്രാറ്റുകൾ വിജയിക്കുമെന്ന് പ്രവചനങ്ങൾ ഉണ്ടായിരുന്നുവെങ്കിലും വിജയത്തിന്റെ വ്യാപ്തി പ്രതീക്ഷിച്ചതിലും വലുതായിരുന്നു.

ഇന്ത്യയും യുഎസും തമ്മിലുള്ള ഉലഞ്ഞ ബന്ധം

താരിഫുകൾ, പാകിസ്ഥാനോടുള്ള നയം, ‘മാഗ’ (MAGA) രാഷ്ട്രീയ നിലപാടുകൾ എന്നിവയിൽ ട്രംപ് ഭരണകൂടം സ്വീകരിച്ച സമീപനങ്ങൾ അടുത്തിടെ ഇരുരാജ്യങ്ങളും തമ്മിലുള്ള ബന്ധത്തിൽ അനിശ്ചിതത്വം സൃഷ്ടിച്ചിരുന്നു. ഇന്ത്യൻ സാമ്പത്തിക രംഗത്തെ വിമർശിച്ചതും, ഉയർന്ന താരിഫുകൾ ചുമത്തുമെന്ന് ഭീഷണിപ്പെടുത്തിയതും, H-1B, വിദ്യാർത്ഥി വീസകളിൽ കശന നിയന്ത്രണങ്ങൾ ഏർപ്പെടുത്തിയതും ന്യൂഡൽഹിയെ വാഷിങ്ടണിൽ നിന്ന് അകറ്റാൻ കാരണമായിരുന്നു.

റഷ്യൻ എണ്ണ വാങ്ങുന്നതിന്റെ പേരിൽ ഇന്ത്യയെ നിരന്തരം സമ്മർദ്ദത്തിലാക്കിയ ട്രംപ് ഭരണകൂടം, തിരഞ്ഞെടുപ്പിന് തൊട്ടുമുമ്പ് റഷ്യയിൽ നിന്ന് ഡീസൽ വാങ്ങാൻ കരാറുണ്ടാക്കുകയും ചെയ്തു. കൂടാതെ, പാകിസ്ഥാൻ ഫീൽഡ് മാർഷൽ ആസിം മുനീറുമായി ട്രംപ് കാത്തുസൂക്ഷിച്ച അടുത്ത ബന്ധം ഇന്ത്യയുടെ സുരക്ഷാ താൽപര്യങ്ങൾക്ക് വിരുദ്ധമായിരുന്നു.

ഇരുരാജ്യങ്ങളും തമ്മിലുള്ള ബന്ധത്തിൽ വലിയ തടസ്സമായ മറ്റൊരു വിഷയം ‘ഓപ്പറേഷൻ സിന്ദൂർ’ വെടിനിർത്തലിന്റെ ക്രെഡിറ്റ് ഏറ്റെടുക്കാനുള്ള ട്രംപിന്റെ ശ്രമമായിരുന്നു. പഹൽഗാമിൽ 26 സാധാരണക്കാർ കൊല്ലപ്പെട്ടതിന് മറുപടിയായി ഇന്ത്യ നടത്തിയ സൈനിക നടപടിയെത്തുടർന്ന്, 2025 മേയ് 10-ന് പാകിസ്ഥാൻ ഡിജിഎംഒ ആണ് ഇന്ത്യൻ ഡിജിഎംഒയെ വിളിച്ച് വെടിനിർത്തൽ അഭ്യർത്ഥിച്ചത്. എന്നാൽ, ഈ വിവരം അറിഞ്ഞ ഉടൻ തന്നെ ട്രംപ് സോഷ്യൽ മീഡിയയിലൂടെ താനാണ് വെടിനിർത്തൽ സാധ്യമാക്കിയതെന്നും ആണവയുദ്ധം ഒഴിവാക്കിയതെന്നും അവകാശപ്പെടുകയായിരുന്നു. എന്നാൽ ഇത് വസ്തുതാവിരുദ്ധമാണെന്ന് ഇന്ത്യ ആവർത്തിച്ച് വ്യക്തമാക്കിയതോടെ ട്രംപ് ഇടഞ്ഞു.

വ്യാപാരവും ഇന്ത്യയ്ക്ക് ലഭിക്കുന്ന മുൻതൂക്കവും

നിലവിൽ ഇന്ത്യയിൽ നിന്ന് യുഎസിലേക്കുള്ള കയറ്റുമതിക്ക് 10% അധികത്തീരുവയാണ് ബാധകമായിട്ടുള്ളത്.

ഇന്ത്യ-യുഎസ് വ്യാപാരക്കരാർ ചർച്ചകൾ അന്തിമഘട്ടത്തിലാണെന്ന് ഇരുരാജ്യങ്ങളും വ്യക്തമാക്കിയിട്ടുണ്ട്.

ട്രംപിന്റെ നയങ്ങളും തീരുമാനങ്ങളും പൂർണ്ണമായി അട്ടിമറിക്കാൻ ഡെമോക്രാറ്റുകൾക്ക് കഴിയില്ലെങ്കിലും, യുഎസിനും ഇന്ത്യയടക്കമുള്ള സുഹൃദ് രാഷ്ട്രങ്ങൾക്കും അനുയോജ്യമായ വിധത്തിൽ മാറ്റങ്ങൾ വരുത്താൻ കഴിഞ്ഞേക്കും.

തിരഞ്ഞെടുപ്പിൽ പരാജയപ്പെട്ട ട്രംപിനെ ഇന്ത്യ ഇനി പേടിക്കേണ്ടി വരില്ലെന്നാണ് വിലയിരുത്തൽ. മറ്റു രാജ്യങ്ങൾക്കുമേൽ പഴയതുപോലെ സമ്മർദ്ദം ചെലുത്താനുള്ള രാഷ്ട്രീയ കരുത്ത് ട്രംപിന് നഷ്ടപ്പെട്ടിരിക്കുന്നു. ഇത് വ്യാപാരക്കരാറിൽ കൂടുതൽ ചർച്ചകൾക്കും വിലപേശലുകൾക്കുമുള്ള അവസരമാണ് ഇന്ത്യയ്ക്ക് മുന്നിൽ തുറന്നിടുന്നത്.

പാൽ, പാലുൽപന്നങ്ങൾ എന്നിവ ഇന്ത്യയിലിറക്കി വിപണി പിടിക്കാൻ ട്രംപ് പ്രധാനമായും ലക്ഷ്യമിട്ടിരുന്നു. എന്നാൽ ഇതൊരു കാരണവശാലും അനുവദിക്കില്ലെന്ന ഇന്ത്യയുടെ കടുത്ത നിലപാടാണ് കരാർ വൈകാൻ പ്രധാന കാരണം. ട്രംപ് രാഷ്ട്രീയമായി കൂടുതൽ സമ്മർദ്ദത്തിലായതോടെ, സ്വന്തം നിലപാടുകൾ കൂടുതൽ ശക്തമായി കടുപ്പിക്കാൻ ഇനി ഇന്ത്യയ്ക്ക് സാധിക്കും.

റഷ്യൻ എണ്ണ ഇറക്കുമതിയും ആഗോള വിപണിയും

റഷ്യയോടുള്ള ട്രംപിന്റെ നിലപാടിലും മാറ്റംവന്നിട്ടുണ്ട്. റഷ്യൻ എണ്ണ വാങ്ങുന്ന രാജ്യങ്ങൾക്കുമേൽ 100% വരെ തീരുവ ചുമത്താൻ നിർദേശിക്കുന്ന ബില്ലിൽ ട്രംപ് ഒപ്പുവെച്ചെങ്കിലും ഒരൊറ്റ രാജ്യത്തിനുമേലും അത് ഇതുവരെ നടപ്പിലാക്കിയിട്ടില്ല. അമേരിക്കയിൽ ഡീസൽ വില ചരിത്രത്തിലെ ഏറ്റവും ഉയർന്ന നിരപ്പിലെത്തിയതിനു പിന്നാലെ മലക്കംമറിഞ്ഞ ട്രംപ്, റഷ്യൻ ഡീസൽ വാങ്ങുന്ന തീരുമാനത്തിലേക്കും എത്തിച്ചേർന്നു.

ഇത് ഇന്ത്യയ്ക്ക് വലിയ അനുകൂല സാഹചര്യമാണ് നൽകുന്നത്. സെനറ്റിലും ജനപ്രതിനിധി സഭയിലും റിപ്പബ്ലിക്കൻ പാർട്ടിയുടെ ഭൂരിപക്ഷം നഷ്ടപ്പെട്ടത് ട്രംപിന്റെ ജനവിരുദ്ധ നയങ്ങൾക്കെതിരെയുള്ള വിധിയെഴുത്തായാണ് വിലയിരുത്തപ്പെടുന്നത്. അതിനാൽ, റഷ്യൻ എണ്ണയുടെ പേരിൽ വലിയ കടുംപിടിത്തങ്ങളിലേക്ക് ഇനി ട്രംപ് കടക്കാനുള്ള സാധ്യത വളരെ വിരളമാണ്.

കൂടാതെ, ഇറാനെതിരായ യുദ്ധത്തിൽ നിന്ന് പിന്മാറാൻ ഡെമോക്രാറ്റുകൾ ട്രംപിനോട് ശക്തമായി ആവശ്യപ്പെട്ടേക്കാം. ഇത് അന്താരാഷ്ട്ര വിപണിയിൽ എണ്ണവില കുറയാൻ വഴിയൊരുക്കും. ക്രൂഡോയിൽ വില താഴുന്നത് ആഗോളതലത്തിൽ പണപ്പെരുപ്പം ഗണ്യമായി കുറയാൻ സഹായിക്കും. ആകെ ഉപഭോഗത്തിന്റെ 90% എണ്ണയും പുറത്തുനിന്ന് ഇറക്കുമതി ചെയ്യുന്ന ഇന്ത്യയ്ക്കും ഈ സാഹചര്യം വലിയ നേട്ടമാകും. എണ്ണവില കുറയുന്നതോടെ പണപ്പെരുപ്പപ്പേടിയും അകലുകയും, ഇതുവഴി പലിശനിരക്ക് കുത്തനെ കൂടാനുള്ള സാധ്യതയും മങ്ങുകയും ചെയ്യും. ട്രംപിന്റെ ജനപ്രീതി ഇടിയാൻ കാരണമായ പ്രധാന ഘടകം വിലക്കയറ്റമായിരുന്നു എന്നത് ശ്രദ്ധേയമാണ്.

സാമ്പത്തിക വിപണിയിലും സ്വർണവിലയിലുമുണ്ടാകുന്ന മാറ്റങ്ങൾ

ഡോളറും ബോണ്ട് യീൽഡും എണ്ണവിലയും താഴുന്നതും, പണപ്പെരുപ്പവും പലിശനിരക്കും കൂടാനുള്ള സാധ്യത മങ്ങുന്നതും സ്വർണത്തിന് വലിയ നേട്ടമായി മാറും. സ്വർണവില കൂടുതൽ ഉയരത്തിലേക്ക് കുതിച്ചുകയറുകയാണ്. ഔൺസിന് 3,917 ഡോളറായിരുന്ന രാജ്യാന്തരവില, തിരഞ്ഞെടുപ്പ് ഫലത്തിന് പിന്നാലെ 4,030 ഡോളറിലേക്ക് ഇരച്ചുകയറിയിട്ടുണ്ട്. ഇതിന്റെ പ്രതിഫലനം കേരളത്തിലെ വിപണിയിലും സ്വർണവില വൻതോതിൽ കുതിച്ചുയരുന്നതിന് കാരണമായിട്ടുണ്ട്.

ട്രംപിന്റെ പാർട്ടിയുടെ പരാജയവും പണപ്പെരുപ്പ ഭയം കുറയുന്നതും യുഎസ് ഡോളർ ഇൻഡക്സ്, യുഎസ് ട്രഷറി യീൽഡ് എന്നിവ ഇടിയാൻ വഴിയൊരുക്കിയിട്ടുണ്ട്. ഇത് ഇന്ത്യൻ രൂപയുടെ വിനിമയ മൂല്യം മെച്ചപ്പെടാൻ ഏറെ സഹായിക്കും. കൂടാതെ, ഇന്ത്യൻ ഓഹരി, കടപ്പത്ര വിപണിയിലേക്ക് വൻതോതിൽ വിദേശനിക്ഷേപം (FII) ഒഴുകിയെത്താനും ഇത് കളമൊരുക്കും.

ടെക്സസ് വിജയവും എഐ മേഖലയും

ടെക്സസിൽ ഗവർണർ തിരഞ്ഞെടുപ്പിലും സെനറ്റ് സീറ്റിലും ഡെമോക്രാറ്റുകൾ നേടിയ വമ്പൻ വിജയം പരോക്ഷമായി ഇന്ത്യയ്ക്കും ഗുണം ചെയ്യുമെന്നാണ് കണക്കുകൂട്ടലുകൾ. പതിറ്റാണ്ടുകൾക്ക് ശേഷമാണ് ടെക്സസിൽ ഒരു ഡെമോക്രാറ്റ് വിജയം ഉണ്ടാകുന്നത്. യുഎസിൽ ഡാറ്റാ സെന്ററുകളുടെ പ്രധാന കേന്ദ്രവും, ഇലോൺ മസ്ക് അടക്കമുള്ള പ്രമുഖ ടെക് ഭീമന്മാരുടെ താവളവുമാണ് ടെക്സസ്. പുതിയ ഡാറ്റാ സെന്ററുകളുടെ സ്ഥാപനത്തിന് എതിരായ നിലപാടാണ് ഡെമോക്രാറ്റുകൾക്കുള്ളത്. അതിനാൽ, ടെക്സസിലെ അവരുടെ ഈ വിജയം ആർട്ടിഫിഷ്യൽ ഇന്റലിജൻസ് (AI) കമ്പനികളുടെ ഓഹരികളിൽ വലിയ ഇടിവിന് വഴിവെച്ചേക്കാം. ഒപ്പം, പുതിയ എഐ നിക്ഷേപങ്ങളും പദ്ധതികളും മന്ദഗതിയിലാകാനും ഇത് ഇടയാക്കിയേക്കും.

ഇറാൻ യുദ്ധവും പശ്ചിമേഷ്യയിലെ പ്രതിസന്ധികളും

കനത്ത തോൽവിക്ക് കാരണം ഇറാൻ യുദ്ധമാണെന്ന് യുഎസ് വൈസ് പ്രസിഡന്റ് ജെ.ഡി. വാൻസ് പരസ്യമായി സമ്മതിക്കുന്നുണ്ട്. ട്രംപും ഇത് ചെറിയ രീതിയിൽ സമ്മDതിക്കുന്നുണ്ടെങ്കിലും പൂർണ്ണമായി അംഗീകരിക്കാൻ ഇതുവരെ തയ്യാറായിട്ടില്ല. “ഞങ്ങൾ തോൽക്കാൻ കാരണം യുദ്ധമാണ്” എന്ന് എക്സിലെ (Twitter) കുറിപ്പിൽ വാൻസ് വ്യക്തമാക്കി. പാർട്ടിയുടെ കനത്ത പരാജയത്തിന് ശേഷം ആദ്യമായാണ് വാൻസ് ഇത്തരമൊരു പ്രതികരണം നടത്തിയത്. എന്നാൽ യുദ്ധത്തിൽനിന്ന് പിന്നോട്ടില്ലെന്നാണ് ട്രംപ് ഇതിനോടൊപ്പം കൂട്ടിച്ചേർക്കുന്നത്. രാഷ്ട്രീയമായി ദുർബലനായ ട്രംപ്, ഇറാനിൽ നിന്ന് യുദ്ധം അവസാനിപ്പിച്ച് പിന്മാറണോ അതോ ഇറാനെതിരെ സൈനിക നീക്കം കൂടുതൽ ശക്തമാക്കണോ എന്ന കടുത്ത ആശയക്കുഴപ്പത്തിലാണ്. ട്രംപിന്റെ അടുത്ത നീക്കം എങ്ങനെയുമായിരിക്കും എന്ന വലിയ ആശങ്കയിലാണ് ഗൾഫ് രാഷ്ട്രങ്ങൾ നിലവിലുള്ളത്.

ട്രംപിന്റെ റിപ്പബ്ലിക്കൻ പാർട്ടിയുടെ പരാജയം സാമ്പത്തിക മേഖല വലിയ ആവേശത്തോടെയാണ് ആഘോഷിക്കുന്നത്. പരാജയത്തിന് കാരണം ഇറാൻ യുദ്ധവും എണ്ണവിലക്കയറ്റവുമാണെന്ന് ട്രംപ് പോലും സമ്മതിച്ചതോടെ നിക്ഷേപകർക്ക് ആത്മവിശ്വാസം വർദ്ധിച്ചിട്ടുണ്ട്. ഇതിനിടെ, ഇസ്രയേലിൽ ബെന്യാമിൻ നെതന്യാഹു പ്രധാനമന്ത്രി പദത്തിൽ തുടരില്ലെന്ന തരത്തിലുള്ള റിപ്പോർട്ടുകളും പുറത്തുവരുന്നുണ്ട്. ഇത് പശ്ചിമേഷ്യൻ യുദ്ധത്തിന് പരിഹാരമായേക്കുമെന്ന പ്രതീക്ഷ ശക്തമാക്കുന്നു. എന്നാൽ, ഇടക്കാല തിരഞ്ഞെടുപ്പ് ഫലം യുഎസിന്റെ നയങ്ങളിൽ യാതൊരു മാറ്റവുമുണ്ടാക്കില്ലെന്നും ഇറാനെതിരെയുള്ള നിലപാട് കൂടുതൽ രൂക്ഷമാകാനാണ് സാധ്യതയെന്നുമാണ് ഇറാനിയൻ പരമോന്നത നേതാവ് മുജ്തബ ഖമനയി മുന്നറിയിപ്പ് നൽകുന്നത്. ഏതെങ്കിലും തരത്തിൽ ഇറാനെതിരെ ഉണ്ടാകുന്ന പുതിയ ആക്രമണങ്ങൾക്ക് ശക്തമായ ഭാഷയിൽ തിരിച്ചടി നൽകുമെന്നും അദ്ദേഹം വ്യക്തമാക്കുന്നുണ്ട്.