ന്യൂഡൽഹി: ഉത്തരാഖണ്ഡിൽ ആറ് പേരുടെ മരണത്തിനിടയാക്കിയ ഹെലികോപ്റ്റർ അപകടത്തിൽ അന്വേഷണം ആരംഭിച്ചു. എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയാണ് അന്വേഷണം നടത്തുന്നത്. ജോഷിമഠിന് സമീപം ഇന്നലെ ഉച്ചയോടെയാണ് ഹെലികോപ്റ്റർ തകർന്നുവീണത്.
ബദരീനാഥിൽ നിന്ന് ഡെറാഡൂണിലേക്ക് പോവുകയായിരുന്ന ഹെലികോപ്റ്റർ ജോഷിമഠിലെ ഛായി ഗ്രാമത്തിന് സമീപമാണ് അപകടത്തിൽപ്പെട്ടത്. ഉച്ചയ്ക്ക് 1.12ന് യാത്ര ആരംഭിച്ച ഹെലികോപ്റ്ററുമായുള്ള റഡാർ, റേഡിയോ ബന്ധം രണ്ട് മിനിറ്റിനുള്ളിൽ നഷ്ടമായി.
ഹെലികോപ്റ്റർ താഴേക്ക് പതിക്കുന്നത് സമീപത്തെ സൈനിക പോസ്റ്റിലുണ്ടായിരുന്ന സൈനികർ കണ്ടിരുന്നു. പിന്നാലെ താഴ്‌വരയിൽ നിന്ന് പുക ഉയരുന്നതും ശ്രദ്ധയിൽപ്പെട്ടു. സൈനികർ വിവരം കൺട്രോൾ റൂമിൽ അറിയിച്ചു. തുടർന്ന് സൈന്യവും ദുരന്തനിവാരണ സേനയും പൊലീസും ചേർന്ന് നടത്തിയ പരിശോധനയിലാണ് ഹെലികോപ്റ്ററിന്റെ അവശിഷ്ടങ്ങളും മൃതദേഹങ്ങളും കണ്ടെത്തിയത്.
പൈലറ്റായ ഡൽഹി സ്വദേശി ക്യാപ്റ്റൻ ഹിമാൻഷു സബർവാളും അഞ്ച് യാത്രക്കാരുമാണ് അപകടത്തിൽ മരിച്ചത്. ബെംഗളൂരു സ്വദേശികളായ അരുൺ സാലുങ്കെ, എച്ച്.എസ്. നടരാജ്, കെ. സുധീർ, ശങ്കർ ഗൗഡ എന്നിവരും മരിച്ചവരിൽ ഉൾപ്പെടുന്നു. ട്രാൻസ് ഭാരത് ഏവിയേഷൻ കമ്പനിയുടെ ഹെലികോപ്റ്ററാണ് അപകടത്തിൽപ്പെട്ടത്.
അപകടത്തിന് തൊട്ടുമുമ്പ് ഇതേ റൂട്ടിലൂടെ രണ്ട് ഹെലികോപ്റ്ററുകൾ സുരക്ഷിതമായി യാത്ര പൂർത്തിയാക്കിയിരുന്നു. അതിനാൽ കാലാവസ്ഥാ വ്യതിയാനമാണോ സാങ്കേതിക തകരാറാണോ അപകടത്തിന് കാരണമായതെന്ന് അന്വേഷണ സംഘം പരിശോധിക്കുന്നുണ്ട്.
കഴിഞ്ഞ പത്ത് വർഷത്തിനിടെ ഉത്തരാഖണ്ഡിൽ ഉണ്ടായ 13-ാമത്തെ ഹെലികോപ്റ്റർ അപകടമാണിത്. ആറ് അപകടങ്ങളിലായി 27 പേർക്ക് ജീവൻ നഷ്ടമായിട്ടുണ്ട്. തീർത്ഥാടന സീസണുകളിൽ ഹെലികോപ്റ്റർ സർവീസുകളുടെ സുരക്ഷാ പരിശോധനയിൽ വീഴ്ചയുണ്ടാകുന്നുവെന്ന പരാതികളും ഉയരുന്നുണ്ട്.
അപകടത്തെ തുടർന്ന് ട്രാൻസ് ഭാരത് ഏവിയേഷന്റെ ഉത്തരാഖണ്ഡിലെ എല്ലാ ഹെലികോപ്റ്റർ സർവീസുകളും സിവിൽ ഏവിയേഷൻ ഡെവലപ്‌മെന്റ് അതോറിറ്റി താൽക്കാലികമായി റദ്ദാക്കി.
