ആലപ്പുഴ: കായംകുളം മണ്ഡലത്തിലെ തോൽവിയിൽ അസന്തോഷം പ്രകടിപ്പിച്ച് എൽഡിഎഫ് സ്ഥാനാർത്ഥി യു. പ്രതിഭ. തനിക്കെതിരെ ചിലർ പ്രവർത്തിച്ചതാണ് തോൽവിക്ക് കാരണമെന്ന് പ്രതിഭ ആരോപിച്ചു. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ തനിക്കെതിരെ പ്രവർത്തിച്ചുവെന്നാണ് പ്രതിഭയുടെ ആരോപണം. ഇതു കാരണം എസ്എൻഡിപി വോട്ടുകളിൽ ചോർച്ച ഉണ്ടായെന്നും അവർ പറഞ്ഞു.
പാർട്ടിക്ക് ശക്തമായ കേന്ദ്രങ്ങളിലുപോലും വോട്ട് കുറഞ്ഞതായി പ്രതിഭ ചൂണ്ടിക്കാട്ടി. പത്തിയൂർ, ചെട്ടികുളങ്ങര പ്രദേശങ്ങളിൽ ഭൂരിപക്ഷം കുറഞ്ഞത് അമ്പരപ്പുണ്ടാക്കിയെന്നും അവർ വ്യക്തമാക്കി. കഴിഞ്ഞ തവണത്തേതുപോലെ പ്രവർത്തനം ശക്തമായിരുന്നില്ലെന്നും പ്രതിഭ വിമർശിച്ചു.
സ്ഥിരമായി ഒന്നാമത് നേടിയിരുന്ന ബൂത്തുകളിൽ പോലും മുന്നേറാൻ സാധിക്കാത്തത് ഗൗരവമായി കാണണമെന്നും അവർ പറഞ്ഞു. വിഷയത്തിൽ പാർട്ടി ഔദ്യോഗികമായി പ്രതികരിക്കണമെന്നും പ്രതിഭ ആവശ്യപ്പെട്ടു. കേരളത്തിന്റെ പല ഭാഗങ്ങളിലും ഇത്തരത്തിലുള്ള പ്രതികൂല പ്രവർത്തനം ഉണ്ടായിട്ടുണ്ടെന്നുമാണ് പ്രതിഭയുടെ ആരോപണം.
