തിരുവനന്തപുരം: വെള്ളറടയ്ക്ക് സമീപം എംഡിഎംഎയുമായി യുവാവിനെ പൊലീസ് പിടികൂടി. വെള്ളറട അനന്ത ശ്രീരാഗം വീട്ടിൽ അനന്തു (27) ആണ് അറസ്റ്റിലായത്. വെള്ളറട ജംഗ്ഷന് സമീപം എംഡിഎംഎ വിൽപ്പന നടക്കുന്നതായി ലഭിച്ച രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് അനന്തു പിടിയിലായത്. ഇയാളിൽനിന്ന് ഒരു ഗ്രാം എംഡിഎംഎ പൊലീസ് പിടിച്ചെടുത്തു.

രാത്രികാലങ്ങളിൽ വിവിധ സ്ഥലങ്ങളിൽ നിന്നുള്ള യുവാക്കൾ ഇവിടെ കൂട്ടം കൂടുന്നതായി നാട്ടുകാർ പൊലീസിനെ അറിയിച്ചിരുന്നു. ഇതിന്റെ അടിസ്ഥാനത്തിൽ പൊലീസ് നടത്തിയ പരിശോധനയ്ക്കിടെയാണ് എംഡിഎംഎ കൈമാറ്റം നടക്കുന്നതായി വിവരം ലഭിച്ചത്.

തുടർന്ന് സ്ഥലത്തെത്തിയ പൊലീസ് അനന്തുവിനെ പിടികൂടുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സബ് ഇൻസ്‌പെക്ടർ മനോജ്, സിവിൽ പൊലീസ് ഉദ്യോഗസ്ഥരായ ദുനിഷ്, ദീപു എന്നിവരടങ്ങിയ സംഘമാണ് പ്രതിയെ പിടികൂടിയത്.