കോഴിക്കോട്: ലോൺ ആപ്പ് ഭീഷണിക്ക് പിന്നാലെ വടകര സ്വദേശി വിഷ്ണുവിനെ കാണാതായ സംഭവത്തിൽ അന്വേഷണം ഊർജിതമാക്കി പൊലീസ്. കർണാടക കേന്ദ്രീകരിച്ചാണ് നിലവിൽ അന്വേഷണം നടക്കുന്നത്. ബെംഗളൂരു, മംഗളൂരു എന്നിവിടങ്ങളിലായി പ്രത്യേക സംഘങ്ങളായി തിരിഞ്ഞ് പൊലീസ് പരിശോധന തുടരുന്നു. സിസിടിവി ദൃശ്യങ്ങളും വിവിധ ഇടങ്ങളിൽ നിന്ന് ശേഖരിച്ചുവരികയാണ്.
ബേക്കൽ ഭാഗത്തുവെച്ചാണ് വിഷ്ണുവിന്റെ ഫോൺ അവസാനമായി സ്വിച്ച് ഓഫ് ആയതെന്ന് കണ്ടെത്തിയിട്ടുണ്ട്. അതിന് മുമ്പ് അദ്ദേഹം സഞ്ചരിച്ച വഴികളിലെ സിസിടിവി ദൃശ്യങ്ങൾ പൊലീസ് പരിശോധിച്ചു വരുന്നു. വടകര ബസ് സ്റ്റാൻഡിൽ നിന്നുള്ള അവസാന ദൃശ്യങ്ങളും അന്വേഷണ സംഘത്തിന് ലഭിച്ചിട്ടുണ്ട്.
വിവരമനുസരിച്ച്, ബാങ്കിൽ പോകാനെന്ന് പറഞ്ഞ് വീട്ടിൽ നിന്നിറങ്ങിയ വിഷ്ണു വടകരയിൽ വെച്ച് സുഹൃത്തിന്റെ എടിഎം വഴി 1000 രൂപ പിന്വലിച്ചിരുന്നു. തന്റെ എടിഎം കാർഡ് ഇല്ലെന്ന് പറഞ്ഞതിനെ തുടർന്ന് ഗൂഗിൾ പേ വഴി സുഹൃത്തിന് പണം അയച്ചിരുന്നു. തുടർന്ന് സുഹൃത്ത് ആ തുക എടിഎം വഴി പിൻവലിച്ച് നൽകി.
ഇതിന് പിന്നാലെ വിഷ്ണുവിന് ഒരു ഫോൺ കോൾ വന്നതായി സുഹൃത്ത് പൊലീസിന് മൊഴി നൽകിയിട്ടുണ്ട്. ഈ കോളിന് ശേഷം വിഷ്ണു അസ്വസ്ഥനായി കാണപ്പെട്ടുവെന്നും സുഹൃത്ത് പറയുന്നു. തുടർന്ന് അദ്ദേഹം ടൗണിലേക്ക് പോയതായാണ് വിവരം. വസ്ത്രം വാങ്ങാനാണ് പോകുന്നതെന്ന് വീട്ടുകാരോട് പറഞ്ഞിരുന്നതായും അറിയുന്നു.
അവസാനമായി സഹോദരങ്ങളുമായി സംസാരിച്ച ശേഷമാണ് വിഷ്ണുവിനെക്കുറിച്ചുള്ള വിവരങ്ങൾ നഷ്ടപ്പെട്ടത്. ഫോൺ കോളിന് ശേഷം അദ്ദേഹം മാനസികമായി ഏറെ സമ്മർദ്ദത്തിലായിരുന്നുവെന്ന് കുടുംബം പറയുന്നു.
ലോൺ ആപ്പുകളിൽ നിന്ന് എടുത്ത വായ്പകൾ ഉൾപ്പെടെ ഏകദേശം ഒരു ലക്ഷം രൂപയുടെ കടബാധ്യത വിഷ്ണുവിനുണ്ടായിരുന്നുവെന്ന് പൊലീസ് കണ്ടെത്തിയിട്ടുണ്ട്. തിരിച്ചടവ് മുടങ്ങിയതിനെ തുടർന്ന് ലോൺ ആപ്പ് സംഘങ്ങൾ മോർഫ് ചെയ്ത ചിത്രങ്ങൾ ഉൾപ്പെടെ അയച്ച് ഭീഷണിപ്പെടുത്തിയതായും കുടുംബം ആരോപിക്കുന്നു.
വിഷ്ണുവിന്റെ ബൈക്കും ഇപ്പോൾ കാണാതായിട്ടുണ്ട്. സംഭവത്തിൽ വിവിധ സാധ്യതകൾ പരിശോധിച്ച് പൊലീസ് അന്വേഷണം തുടരുകയാണ്.
