തിരുവനന്തപുരം: പുതുമുഖ എംഎൽഎമാർ നിയമസഭയെ ഗൗരവമായി സമീപിക്കുന്നില്ലെന്ന വിമർശനവുമായി സ്പീക്കർ എ.എൻ. ഷംസീർ രംഗത്ത്. പതിനഞ്ചാം കേരള നിയമസഭയുടെ സ്പീക്കർ എന്ന നിലയിൽ അവസാന ഔദ്യോഗിക പരിപാടിക്ക് ശേഷമാണ് അദ്ദേഹം ഈ അഭിപ്രായം പങ്കുവെച്ചത്.
വരാനിരിക്കുന്ന നിയമസഭാംഗങ്ങൾ സഭയെ കൂടുതൽ ഗൗരവത്തോടെ കാണണമെന്ന് ഉപദേശിച്ച ഷംസീർ, പുതിയ അംഗങ്ങൾ സഭയ്ക്കുള്ളിൽ വേണ്ടത്ര സമയം ചെലവഴിക്കുന്നില്ലെന്ന് വിമർശിച്ചു. പുസ്തകങ്ങൾ വായിച്ച് സഭാ നടപടികൾ പഠിക്കുന്നതുകൊണ്ട് മാത്രം പോരെന്നും, സഭയിൽ സജീവമായി പങ്കെടുക്കണമെന്നും അദ്ദേഹം പറഞ്ഞു.
യുഡിഎഫ്-എൽഡിഎഫ് ഭേദമില്ലാതെ പല പുതുമുഖ അംഗങ്ങളും സഭയിൽ ആവശ്യത്തിന് സാന്നിധ്യമില്ലെന്ന വിമർശനവും അദ്ദേഹം ഉയർത്തി. അതേസമയം, സീനിയർ അംഗങ്ങൾ സഭയിൽ കൂടുതൽ സജീവമായി പങ്കെടുക്കുന്നുണ്ടെന്നും അദ്ദേഹം കൂട്ടിച്ചേർത്തു.
