തിരുവനന്തപുരം: നിയമസഭാ തിരഞ്ഞെടുപ്പിലെ വിജയത്തിന് പിന്നാലെ, മുഖ്യമന്ത്രിയെ തെരഞ്ഞെടുക്കാനുളള നടപടികളിലേക്ക് കടന്നിരിക്കുകയാണ് കോണ്ഗ്രസ്. 45 എംഎല്എമാരുടെ പിന്തുണയുണ്ടെന്നാണ് കെ സി വേണുഗോപാല് അവകാശപ്പെടുന്നത്. 25 എംഎല്എമാരുടെ പിന്തുണ രമേശ് ചെന്നിത്തലയും അവകാശപ്പെടുന്നു. 25 എംഎല്എമാരുടെ പിന്തുണയാണ് വി ഡി സതീശൻ പ്രതീക്ഷിക്കുന്നത്.
മുഖ്യമന്ത്രിയെ തെരഞ്ഞെടുക്കുന്നതില് എംഎല്എമാര്ക്ക് രഹസ്യമായി അഭിപ്രായം അറിയിക്കാന് ഹെെക്കമാൻഡ് അവസരമൊരുക്കണമെന്ന് ആവശ്യപ്പെട്ടിരിക്കുകയാണ് വി ഡി സതീശൻ. നിരീക്ഷകര് അല്ലാത്തവര് അഭിപ്രായം കേള്ക്കേണ്ടതില്ലെന്നാണ് വി ഡി പക്ഷത്തിന്റെ വാദം. എംഎല്എമാരുടെ അഭിപ്രായങ്ങള് കേള്ക്കുമ്പോള് കേരളത്തിന്റെ ചുമതലയുളള എഐസിസി ജനറൽ സെക്രട്ടറി ദീപ ദാസ് മുന്ഷി ഉണ്ടാകാന് പാടില്ലെന്നാണ് ആവശ്യം.
എഐസിസി നിരീക്ഷകരായ മുകുള് വാസ്നികും അജയ് മാക്കനും ഇന്ന് തിരുവനന്തപുരത്ത് എത്തും. നിയമസഭാ കക്ഷിയോഗത്തിന് മുന്പ് എംഎല്എമാരെ നേരിട്ട് കാണാനാണ് നീക്കം.
