കോഴിക്കോട്: വിദ്യാർത്ഥിനികൾക്ക് ആർത്തവ അവധി അനുവദിക്കുന്നതിൽ സർക്കാർ സ്വീകരിച്ച നിലപാട് ഉചിതമാണെന്ന് എംഎൽഎ ഫാത്തിമ തഹിലിയ അഭിപ്രായപ്പെട്ടു. പല രാജ്യങ്ങളിലും സമാനമായ രീതികൾ നിലവിലുണ്ടെന്നും അവർ ചൂണ്ടിക്കാട്ടി.
പല വിദ്യാർത്ഥിനികളും ശാരീരിക ബുദ്ധിമുട്ടുകൾ, സമ്മർദ്ദം, മൂഡ് സ്വിങ്സ് തുടങ്ങിയ പ്രശ്നങ്ങൾ നേരിടുന്ന സാഹചര്യത്തിൽ അവരെ പരിഗണിക്കുന്ന നടപടിയാണിത് എന്ന് ഫാത്തിമ തഹിലിയ പറഞ്ഞു. ഇത് സ്വകാര്യതയിലേക്കുള്ള കടന്നുകയറ്റമായി കാണേണ്ടതില്ലെന്നും അവധി നിർബന്ധിതമല്ലെന്നും അവർ വ്യക്തമാക്കി. ആൺകുട്ടികൾക്കും ഇതുസംബന്ധിച്ച ബോധവൽക്കരണം ആവശ്യമാണെന്നും അവർ കൂട്ടിച്ചേർത്തു.
ഇതിനിടെ, വിഷയത്തിൽ വ്യത്യസ്ത അഭിപ്രായങ്ങളും ഉയരുന്നുണ്ട്. കോൺഗ്രസ് എംഎൽഎ ഉമാ തോമസ്, ആർത്തവം സ്ത്രീകളുടെ സ്വാഭാവികമായ ജൈവപ്രക്രിയയാണെന്നും അവരെ വേർതിരിച്ച് കാണുന്നത് ശരിയല്ലെന്നും അഭിപ്രായപ്പെട്ടു.
മുസ്ലിം ലീഗ് നേതാവ് അഡ്വ. നൂർബിന റഷീദ്, ആർത്തവ അവധി പെൺകുട്ടികളുടെ സ്വകാര്യതയെ ബാധിക്കാമെന്ന ആശങ്ക ഉയർത്തി. സ്കൂളുകളിലും കോളേജുകളിലും അവധി രേഖപ്പെടുത്തുമ്പോൾ സ്വകാര്യ വിവരങ്ങൾ പുറത്താകാൻ സാധ്യതയുണ്ടെന്നും അവർ പറഞ്ഞു.
ഇതിനിടെ, വിദ്യാഭ്യാസ വകുപ്പ് മന്ത്രി എൻ. ഷംസുദ്ദീൻ, പരാതികളുണ്ടെങ്കിൽ വിഷയത്തിൽ പുനഃപരിശോധന നടത്തുമെന്ന് അറിയിച്ചു. എന്നാൽ ബുദ്ധിമുട്ട് അനുഭവിക്കുന്ന വിദ്യാർത്ഥിനികളെ പരിഗണിക്കേണ്ടത് അനിവാര്യമാണെന്നും അദ്ദേഹം വ്യക്തമാക്കി.
