തിരുവനന്തപുരം: സംസ്ഥാനത്ത് ലഹരിമാഫിയക്കെതിരായ ശക്തമായ നടപടികൾക്ക് തുടക്കം കുറിച്ച് ‘ഓപ്പറേഷൻ തൂഫാൻ’ പദ്ധതിക്ക് ഔദ്യോഗികമായി തുടക്കമായി. തിരുവനന്തപുരത്ത് നടന്ന ചടങ്ങിൽ മുഖ്യമന്ത്രി ഉദ്ഘാടനം നിർവഹിച്ചു.
കേരളത്തിൽ കുറ്റകൃത്യങ്ങളുടെ സ്വഭാവം മാറിയിരിക്കുകയാണെന്നും മയക്കുമരുന്ന് ഉപയോഗം ഗുരുതര സാമൂഹിക പ്രശ്നമായി മാറിയെന്നും മുഖ്യമന്ത്രി പറഞ്ഞു. ലഹരി മാഫിയയെ സംസ്ഥാനത്ത് നിന്ന് പൂർണ്ണമായും ഇല്ലാതാക്കുക ലക്ഷ്യമാണെന്നും, പോലീസ്-എക്സൈസ് വിഭാഗങ്ങളുടെ സംയുക്ത പ്രവർത്തനത്തിലൂടെ പദ്ധതി മുന്നോട്ട് പോകുമെന്നും അദ്ദേഹം വ്യക്തമാക്കി.
പുതിയ പദ്ധതിയുടെ നോഡൽ ഓഫീസറായി ഐജി പുട്ട വിമലാദിത്യയെ നിയമിച്ചതായി വേദിയിൽ പ്രഖ്യാപിച്ചു. ലഹരി വിരുദ്ധ പ്രവർത്തനങ്ങൾ കൂടുതൽ ഏകോപിതമായി നടത്തുകയാണ് ലക്ഷ്യമെന്ന് അധികൃതർ അറിയിച്ചു.
പദ്ധതി ആവിഷ്കരിച്ച ആഭ്യന്തര മന്ത്രി രമേശ് ചെന്നിത്തല പുതുതലമുറയെ ലക്ഷ്യമിട്ടുള്ള ലഹരി വ്യാപാരത്തിനെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്ന് വ്യക്തമാക്കി. ഡിജെ പാർട്ടികളിലും ഫൈവ് സ്റ്റാർ ഹോട്ടലുകളിലും വരെ ലഹരി വിൽപ്പന നടക്കുന്നുണ്ടെന്നും ഇത്തരം പ്രവർത്തനങ്ങൾ കർശനമായി തടയുമെന്നും അദ്ദേഹം പറഞ്ഞു.
നിയമത്തിന് മുന്നിൽ പദവിയോ പണമോ ബാധകമല്ലെന്നും, കേസുകളിൽ വഴിവിട്ട സഹായം നൽകുന്ന ഉദ്യോഗസ്ഥർക്കെതിരെയും നടപടി ഉണ്ടാകുമെന്നും ആഭ്യന്തര മന്ത്രി മുന്നറിയിപ്പ് നൽകി. ലഹരി വിൽപ്പന നടത്തുന്നവർക്ക് കടുത്ത നിയമനടപടികൾ നേരിടേണ്ടിവരുമെന്നും അദ്ദേഹം വ്യക്തമാക്കി.
