റിയാദ്: ഗൾഫ് പ്രവാസികൾക്കും നാട്ടിലേക്ക് യാത്ര ചെയ്യുന്നവർക്കും കൂടുതൽ സൗകര്യം ഒരുക്കി പ്രമുഖ വിമാനക്കമ്പനിയായ ആകാശ എയർ റിയാദ്–കൊച്ചി സെക്ടറിലേക്ക് പുതിയ സർവീസുകൾ ആരംഭിക്കുന്നു. ജൂലൈ 2 മുതൽ ഈ സർവീസുകൾ ഔദ്യോഗികമായി പ്രവർത്തനം ആരംഭിക്കും.
ആഴ്ചയിലെ എല്ലാ ദിവസങ്ങളിലും സർവീസ് ലഭ്യമാകുന്ന രീതിയിലാണ് റിയാദിൽ നിന്നും കൊച്ചിയിലേക്കും തിരിച്ചും വിമാനങ്ങൾ ക്രമീകരിച്ചിരിക്കുന്നത്. റിയാദിൽ നിന്ന് കൊച്ചിയിലേക്ക് തിങ്കൾ, ബുധൻ, വെള്ളി ദിവസങ്ങളിൽ രാത്രി 9.25-ന് പുറപ്പെടുന്ന വിമാനം പിറ്റേന്ന് രാവിലെ 5.25-ന് കൊച്ചിയിൽ എത്തും. ചൊവ്വാഴ്ചകളിൽ രാത്രി 10-ന് പുറപ്പെട്ട് രാവിലെ 6-നും, വ്യാഴം, ഞായർ ദിവസങ്ങളിൽ രാത്രി 11.55-ന് പുറപ്പെട്ട് രാവിലെ 7.55-നും കൊച്ചിയിൽ എത്തിച്ചേരും.
മടക്കയാത്രയ്ക്കായി കൊച്ചിയിൽ നിന്ന് റിയാദിലേക്കുള്ള സർവീസ് തിങ്കൾ, ബുധൻ, വെള്ളി ദിവസങ്ങളിൽ വൈകുന്നേരം 5.25-ന് പുറപ്പെടും. രാത്രി 8.25-ന് വിമാനം റിയാദിൽ എത്തും. ചൊവ്വാഴ്ചകളിൽ വൈകിട്ട് 6-നും, വ്യാഴം, ഞായർ ദിവസങ്ങളിൽ വൈകിട്ട് 7.55-നും പുറപ്പെടുന്ന വിമാനങ്ങൾ രാത്രി യഥാക്രമം 9-നും 10.55-നും റിയാദിൽ എത്തിച്ചേരും.
ടിക്കറ്റുകൾ ആകാശ എയറിന്റെ ഔദ്യോഗിക വെബ്സൈറ്റ് AkasaAir.com, മൊബൈൽ ആപ്പ്, അംഗീകൃത ട്രാവൽ ഏജൻറുകൾ എന്നിവ വഴി ബുക്ക് ചെയ്യാം.
