ബെംഗളൂരു: കർണാടകയിൽ ഡി.കെ. ശിവകുമാർ മന്ത്രിസഭയിലെ വകുപ്പ് വിഭജനവുമായി ബന്ധപ്പെട്ട അസംതൃപ്തി വീണ്ടും പുറത്തുവന്നു. മന്ത്രിമാർക്ക് നൽകിയ വകുപ്പുകളിൽ പ്രതിഷേധവുമായി മുതിർന്ന കോൺഗ്രസ് നേതാവും മന്ത്രിയുമായ കെ.എച്ച്. മുനിയപ്പ രംഗത്തെത്തിയതോടെ വിവാദം കൂടുതൽ ശക്തമായി.
മന്ത്രിസഭയിലെ ഏറ്റവും മുതിർന്ന നേതാക്കളിൽ ഒരാളായ തന്നെ അവഗണിച്ചുവെന്നാണ് മുനിയപ്പയുടെ ആരോപണം. ഭക്ഷ്യ-സിവിൽ സപ്ലൈസ് വകുപ്പാണ് അദ്ദേഹത്തിന് നൽകിയിരിക്കുന്നത്. എന്നാൽ തന്റെ സീനിയോറിറ്റിക്ക് അനുസരിച്ചുള്ള പ്രാധാന്യമുള്ള വകുപ്പ് ലഭിക്കേണ്ടതായിരുന്നുവെന്നാണ് അദ്ദേഹത്തിന്റെ നിലപാട്. ഇക്കാര്യം കോൺഗ്രസ് നേതാക്കളായ രാഹുൽ ഗാന്ധിയെയും മല്ലികാർജുൻ ഖർഗെയെയും അറിയിച്ചതായും മുനിയപ്പ വ്യക്തമാക്കി.
ഇതിനിടെ, മന്ത്രിസഭയിലെ വകുപ്പ് വിഭജനവുമായി ബന്ധപ്പെട്ട് നേരത്തെ തന്നെ മറ്റൊരു പ്രമുഖ നേതാവായ രാമലിംഗ റെഡ്ഡിയും പ്രതിഷേധവുമായി രംഗത്തെത്തിയിരുന്നു. ബെംഗളൂരു നഗര വികസന വകുപ്പ് ലഭിക്കാത്തതിനെ തുടർന്ന് അദ്ദേഹം മന്ത്രിസ്ഥാനം രാജിവെച്ചിരുന്നു.
മന്ത്രിസ്ഥാനം നൽകിയതിന് പാർട്ടി നേതൃത്വത്തോട് നന്ദിയുണ്ടെങ്കിലും, മനസാക്ഷിക്ക് വിരുദ്ധമായി പ്രവർത്തിക്കാൻ കഴിയില്ലെന്ന് രാജി പ്രഖ്യാപന വേളയിൽ രാമലിംഗ റെഡ്ഡി പറഞ്ഞിരുന്നു. മന്ത്രിസ്ഥാനം ലഭിക്കാത്തതല്ല തന്റെ പ്രതിഷേധത്തിന് കാരണമെന്നും, ബെംഗളൂരു നഗര വികസന വകുപ്പ് നൽകാമെന്ന ഉറപ്പ് പാലിക്കാത്തതാണ് രാജിക്ക് പിന്നിലെ കാരണമെന്നും അദ്ദേഹം വ്യക്തമാക്കിയിരുന്നു.
പുതിയ മന്ത്രിസഭ രൂപീകരിച്ച് ദിവസങ്ങൾക്കകം തന്നെ വകുപ്പ് വിഭജനത്തെച്ചൊല്ലിയുള്ള പ്രതിഷേധങ്ങൾ ഉയരുന്നത് കർണാടക കോൺഗ്രസിന് പുതിയ തലവേദനയായി മാറുകയാണ്.
