ലണ്ടൻ: വടക്കൻ അയർലൻഡിൽ സുഡാൻ സ്വദേശിയായ ഒരാളെ ആക്രമിക്കുന്ന വീഡിയോ പുറത്തുവന്നതിന് പിന്നാലെ വ്യാപക സംഘർഷം. സംഭവത്തെ തുടർന്ന് ബെൽഫാസ്റ്റ് ഉൾപ്പെടെ പല പ്രദേശങ്ങളിലും കുടിയേറ്റവിരുദ്ധ പ്രതിഷേധങ്ങൾ അക്രമാസക്തമായി മാറി.
മുഖംമൂടി ധരിച്ച സംഘങ്ങൾ വീടുകൾക്ക് തീയിടുകയും വാഹനങ്ങൾ കത്തിക്കുകയും റോഡുകൾ തടയുകയും ചെയ്തതായി റിപ്പോർട്ടുകളുണ്ട്. കറുത്ത വർഗക്കാരെയും കുടിയേറ്റ സമൂഹങ്ങളെയും ലക്ഷ്യമിട്ടുള്ള ആക്രമണങ്ങളാണ് പ്രധാനമായും നടന്നത്.
തിങ്കളാഴ്ച രാത്രിയുണ്ടായ സംഭവത്തിൽ സുഡാൻ സ്വദേശിയെ റോഡിൽ ആക്രമിച്ച് ഗുരുതരമായി പരിക്കേൽപ്പിക്കുന്ന ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് പ്രതിഷേധം ശക്തമായത്. ഇയാൾ ഇപ്പോൾ ആശുപത്രിയിൽ ചികിത്സയിലാണ്; മുഖത്തും കണ്ണിനും ഗുരുതര പരിക്കുകളുണ്ട്.
സംഭവവുമായി ബന്ധപ്പെട്ട് 30-കാരനായ ഒരാളെ പോലീസ് അറസ്റ്റ് ചെയ്തു. വധശ്രമം ഉൾപ്പെടെ വിവിധ കുറ്റങ്ങൾ ഇയാൾക്കെതിരെ ചുമത്തിയിട്ടുണ്ട്.
തുടർന്ന് ഉണ്ടായ സംഘർഷങ്ങളിൽ ബസുകളും കാറുകളും വീടുകളും കത്തിച്ചതായും, ചില സ്ഥലങ്ങളിൽ പോലീസിനെതിരെയും ആക്രമണമുണ്ടായതായും റിപ്പോർട്ടുണ്ട്. അഗ്നിബാധയിലുണ്ടായ വീടുകളിൽ നിന്ന് പോലീസ് കുടുംബങ്ങളെ സുരക്ഷിതമായി ഒഴിപ്പിച്ചു.
