ചെന്നൈ: കാവേരി നദീജല തർക്കത്തിൽ തമിഴ്നാട് ഇന്ന് സുപ്രീം കോടതിയെ സമീപിക്കും. കർണാടക കാവേരി നദിയിൽ നിന്ന് വെള്ളം വിട്ടുനൽകണമെന്നാണ് തമിഴ്നാടിന്റെ ആവശ്യം. കാവേരി വാട്ടർ മാനേജ്മെന്റ് അതോറിറ്റി ദിവസവും 3,500 ക്യുസെക്സ് വെള്ളം 15 ദിവസത്തേക്ക് തമിഴ്നാടിന് നൽകാൻ കർണാടകയോട് നിർദേശിച്ചിരുന്നു. എന്നാൽ നിലവിൽ ജലക്ഷാമമുള്ളതിനാൽ ഇത്രയും വെള്ളം നൽകാൻ കഴിയില്ലെന്നാണ് കർണാടകയുടെ നിലപാട്.
ഇതിനിടെ, കാവേരി വിഷയത്തിൽ തമിഴ്നാട് സർക്കാരിന്റെ നിലപാടിന് പിന്തുണയുമായി ഡിഎംകെ ഇന്ന് പ്രതിഷേധം സംഘടിപ്പിക്കും. കർഷകരെ പങ്കെടുപ്പിച്ചുള്ള പ്രതിഷേധ യോഗം തഞ്ചാവൂരിൽ നടക്കും. ഡിഎംകെ നേതാവ് ഉദയനിധി സ്റ്റാലിൻ പരിപാടി ഉദ്ഘാടനം ചെയ്യും.
കാവേരി വിഷയത്തിൽ ചർച്ച നടത്താൻ തമിഴ്നാട് മുഖ്യമന്ത്രി വിജയും കർണാടക ഉപമുഖ്യമന്ത്രി ഡി.കെ. ശിവകുമാറും തമ്മിൽ നടക്കാനിരുന്ന കൂടിക്കാഴ്ചയും മാറ്റിവെച്ചു. നിലവിലെ സാഹചര്യത്തിൽ ചർച്ചയ്ക്ക് അനുകൂല സാഹചര്യമില്ലെന്നാണ് ഡി.കെ. ശിവകുമാർ അറിയിച്ചത്. കാവേരി ജലവിതരണ വിഷയത്തിൽ പ്രതിഷേധം ശക്തമായ സാഹചര്യത്തിൽ, വിജയ് ബെംഗളൂരുവിലെത്തിയാൽ വിമാനത്താവളത്തിൽ തടയുമെന്ന് ചില കന്നഡ സംഘടനകൾ മുന്നറിയിപ്പ് നൽകിയിട്ടുണ്ട്.
