കൊച്ചി: കോൺഗ്രസിൽ മുഖ്യമന്ത്രി സ്ഥാനത്തെ ചൊല്ലിയുള്ള ചർച്ചകൾ തുടരുന്നതിനിടെ സംവിധായകൻ ഭദ്രൻ വി.ഡി. സതീശന് പിന്തുണ പ്രഖ്യാപിച്ചു. കേരളത്തിൽ കോൺഗ്രസിനെ വിജയത്തിലേക്ക് നയിച്ച ജനങ്ങൾ വി.ഡി. സതീശനെ മുഖ്യമന്ത്രിയായി കാണാനാണ് ആഗ്രഹിക്കുന്നതെന്ന് ഭദ്രൻ പറഞ്ഞു. അതല്ലാതെ മറ്റൊരു തീരുമാനം വന്നാൽ അത് “രാഷ്ട്രീയ വിഡ്ഢിത്തം” ആയിരിക്കുമെന്നും അദ്ദേഹം അഭിപ്രായപ്പെട്ടു.
ഹൈക്കമാൻഡ് പോരാട്ടത്തിന് മുന്നിൽ നിന്ന നേതാവിനെ അവഗണിക്കരുതെന്നും, അങ്ങനെ സംഭവിച്ചാൽ അത് ജനാധിപത്യത്തിന് വലിയ ആഘാതമാകുമെന്നും ഭദ്രൻ സോഷ്യൽ മീഡിയയിൽ കുറിച്ചു. അതേസമയം മുഖ്യമന്ത്രി സ്ഥാനം ലഭിക്കാത്ത പക്ഷം മറ്റ് പദവികൾ വേണ്ടെന്ന നിലപാടിലാണ് വി.ഡി. സതീശൻ. എംഎൽഎമാരുടെ പിന്തുണ മാത്രം നോക്കാതെ പൊതുവികാരവും ഘടകകക്ഷികളുടെ അഭിപ്രായവും പരിഗണിക്കണമെന്നും അദ്ദേഹം ആവശ്യപ്പെട്ടിട്ടുണ്ട്.
