ന്യൂഡൽഹി: ഗ്രേറ്റ് നിക്കോബാർ പദ്ധതിയുമായി ബന്ധപ്പെട്ട് കോൺഗ്രസ് നേതാവ് രാഹുൽ ഗാന്ധി ഉന്നയിച്ച ആരോപണങ്ങൾ തെറ്റാണെന്ന് മുൻ വ്യോമസേനാ മേധാവി എയർ ചീഫ് മാർഷൽ ആർ.കെ.എസ്. ഭദൗരിയ വ്യക്തമാക്കി. പദ്ധതി രാജ്യത്തിന്റെ തന്ത്രപ്രധാനവും സാമ്പത്തികവുമായ വളർച്ചയ്ക്ക് നിർണായകമാണെന്നും അദ്ദേഹം അഭിപ്രായപ്പെട്ടു.
ആൻഡമാൻ നിക്കോബാർ ദ്വീപുകളുടെ ഭാഗമായ ക്യാമ്പ്ബെൽ ബേ മേഖലയിൽ നടപ്പാക്കുന്ന ഈ ബൃഹദ് വികസന പദ്ധതിയെ രാഹുൽ ഗാന്ധി കടുത്ത രീതിയിൽ വിമർശിച്ചിരുന്നു. ഏകദേശം 160 ചതുരശ്ര കിലോമീറ്റർ മഴക്കാടുകൾ നശിപ്പിക്കപ്പെടുമെന്നും ലക്ഷക്കണക്കിന് മരങ്ങൾ വെട്ടിമാറ്റപ്പെടുമെന്നും, ഇത് ഗോത്രവർഗ പൈതൃകത്തിനും പരിസ്ഥിതിക്കും ഗുരുതരമായ ആഘാതമുണ്ടാക്കുമെന്നുമായിരുന്നു അദ്ദേഹത്തിന്റെ ആരോപണം. വിഷയത്തിൽ പാർലമെന്റിൽ ശക്തമായി ഇടപെടുമെന്നും അദ്ദേഹം പറഞ്ഞിരുന്നു.
എന്നാൽ ഭദൗരിയ ഈ വിമർശനങ്ങളെ അടിസ്ഥാനരഹിതമെന്ന് ചൂണ്ടിക്കാട്ടി. ലോക വ്യാപാരത്തിന്റെ വലിയൊരു പങ്ക് കടന്നുപോകുന്ന മലാക്ക കടലിടുക്കിന് സമീപമാണ് ഈ പ്രദേശമെന്നും, അതിനാൽ ഇന്ത്യയുടെ സമുദ്ര-വ്യോമ നിരീക്ഷണ ശേഷി വർധിപ്പിക്കുന്നതിൽ പദ്ധതി നിർണായകമാണെന്നും അദ്ദേഹം പറഞ്ഞു. ചൈനയുടെ ഊർജ്ജ ഇറക്കുമതിയുമായി ബന്ധപ്പെട്ട സുരക്ഷാ പരിഗണനകളും പശ്ചിമേഷ്യയിലെ നിലവിലെ സാഹചര്യമൊക്കെയും കണക്കിലെടുത്താൽ, ഈ മേഖലയിലെ തന്ത്രപ്രധാന സാന്നിധ്യം അത്യാവശ്യമാണെന്നും അദ്ദേഹം വ്യക്തമാക്കി.
പദ്ധതിയുടെ ഭാഗമായി കണ്ടെയ്നർ ട്രാൻസ്-ഷിപ്മെന്റ് തുറമുഖം, സിവിലിയൻ-സൈനിക ഉപയോഗത്തിന് അനുയോജ്യമായ വിമാനത്താവളം, പവർ പ്ലാന്റ്, ആധുനിക ടൗൺഷിപ്പ് തുടങ്ങിയ സൗകര്യങ്ങൾ ഉൾപ്പെടുന്നുവെന്നാണ് റിപ്പോർട്ട്. ഇതിലൂടെ മേഖലയുടെ അടിസ്ഥാന സൗകര്യ വികസനവും സുരക്ഷാ ശേഷിയും ശക്തിപ്പെടുമെന്ന് അദ്ദേഹം പറഞ്ഞു.
വനനശീകരണത്തെക്കുറിച്ചുള്ള ആശങ്കകൾ അതിരുകവിഞ്ഞതാണെന്നും, ബാധിക്കപ്പെടുന്ന വനപ്രദേശം ആകെ വനവിസ്തൃതിയുടെ ചെറിയ ശതമാനം മാത്രമാണെന്നും ഭദൗരിയ കൂട്ടിച്ചേർത്തു. ഗോത്രവർഗ സമൂഹങ്ങളുടെ താല്പര്യങ്ങൾ സംരക്ഷിക്കാൻ പ്രത്യേക സംവിധാനങ്ങൾ ഒരുക്കിയിട്ടുണ്ടെന്നും, വികസനവും പരിസ്ഥിതി സംരക്ഷണവും തമ്മിൽ സമതുലിതത്വം പാലിക്കാനാണ് സർക്കാർ ശ്രമിക്കുന്നതെന്നും അദ്ദേഹം വ്യക്തമാക്കി.
