തിരുവനന്തപുരം: തിരുവനന്തപുരം നാലാഞ്ചിറ ഉദിയന്നൂരിൽ ഭാര്യയെ കൊലപ്പെടുത്തിയ കേസിൽ ഭർത്താവ് ഒളിവിൽ. മണ്ണന്തല സ്വദേശിനി ഹസീന (36) ആണ് കൊല്ലപ്പെട്ടത്. ബുധനാഴ്ച പുലർച്ചെ അഞ്ചരയോടെയായിരുന്നു സംഭവം. കൊലപാതകത്തിന് ശേഷം ഭർത്താവ് സുരേഷ് കാറിൽ രക്ഷപ്പെട്ടതായി പൊലീസ് അറിയിച്ചു.
സംഭവസമയത്ത് വീട്ടിലുണ്ടായിരുന്ന നാല് മക്കളാണ് മാതാപിതാക്കൾ തമ്മിലുള്ള തർക്കത്തിനും തുടർന്ന് നടന്ന കൊലപാതകത്തിനും സാക്ഷികളായത്. രക്തം പുരണ്ട ആയുധവുമായി പുറത്തിറങ്ങിയ പിതാവിനെ കണ്ട കുട്ടികൾ പരിഭ്രാന്തരായി. അമ്മയുടെ മരണവും പിതാവിന്റെ ഒളിവുപോക്കും നാല് കുട്ടികളെയും ദുരിതത്തിലാഴ്ത്തിയിരിക്കുകയാണ്.
19 വർഷം മുൻപാണ് ഹസീനയും സുരേഷും വിവാഹിതരായത്. പ്രണയവിവാഹമായിരുന്നു. നഗരത്തിലെ വിവിധ ഭാഗങ്ങളിൽ വാടകയ്ക്ക് താമസിച്ചിരുന്ന ഇവർ നാലുമാസം മുൻപാണ് ഉദിയന്നൂരിലേക്ക് മാറിയത്. സുരേഷ് ഇലക്ട്രിക്കൽ തൊഴിലാളിയാണ്. കൊലപാതകത്തിന് ശേഷം മൂത്തമകൾ അമൃതയെ ഫോണിൽ വിളിച്ച സുരേഷ്, താൻ ഇനി മടങ്ങിവരില്ലെന്നും ഇളയ സഹോദരങ്ങളെ നോക്കണമെന്നും പറഞ്ഞതായി സമീപവാസികൾ പറയുന്നു.
കുടുംബത്തിന് നാല് മക്കളാണുള്ളത്. പ്ലസ് ടു വിദ്യാർഥിനിയായ അമൃത, പത്താം ക്ലാസ് വിദ്യാർഥിയായ ആനന്ദ്, യു.പി. സ്കൂൾ വിദ്യാർഥികളായ റോഷൻ, അനയ എന്നിവരാണ് മറ്റ് മക്കൾ. സംഭവവിവരമറിഞ്ഞ് കുട്ടികൾ പഠിക്കുന്ന സ്കൂളുകളിൽ നിന്നുള്ള അധ്യാപകർ വീട്ടിലെത്തി. കടുത്ത മാനസികാഘാതത്തിലായിരുന്ന കുട്ടികൾക്ക് ആശ്വാസം നൽകാനും ആവശ്യമായ സഹായങ്ങൾ ഒരുക്കാനുമാണ് അധ്യാപകർ രംഗത്തെത്തിയത്.
ഭാര്യയെ കാണാനില്ലെന്ന് കാണിച്ച് സുരേഷ് കഴിഞ്ഞയാഴ്ച മണ്ണന്തല പൊലീസിൽ പരാതി നൽകിയിരുന്നു. തുടർന്ന് എലിവിഷം കഴിച്ച് ആത്മഹത്യയ്ക്ക് ശ്രമിച്ചതിനെ തുടർന്ന് ഇയാൾ ആശുപത്രിയിലുമായിരുന്നു. പൊലീസ് ഇടപെടലിനെ തുടർന്ന് തിങ്കളാഴ്ച ഇരുവരും സ്റ്റേഷനിലെത്തി. മധ്യസ്ഥ ചർച്ചകൾക്ക് ശേഷം കുടുംബം ഒരുമിച്ച് വീട്ടിലേക്ക് മടങ്ങിയതായാണ് പൊലീസ് പറയുന്നത്. ഇതിന് പിന്നാലെയാണ് ഹസീന കൊല്ലപ്പെട്ടത്.
ഒളിവിൽ കഴിയുന്ന സുരേഷിനെ കണ്ടെത്താൻ പൊലീസ് അന്വേഷണം വ്യാപിപ്പിച്ചിട്ടുണ്ട്.
