ഇന്ത്യൻ സൂപ്പർ ലീഗിന്റെ പതിമൂന്നാം സീസണിൽ കേരള ബ്ലാസ്റ്റേഴ്സ് ഇന്ന് ആദ്യ മത്സരത്തിനിറങ്ങുന്നു. ഇന്റർ കാശിയാണ് എതിരാളികൾ. വൈകിട്ട് അഞ്ചിന് പുണെയിലാണ് മത്സരം. പുതിയ ഉടമകളായ അൽ ഫുർസാന്റെ കീഴിൽ പുതിയ പ്രതീക്ഷകളുമായാണ് ബ്ലാസ്റ്റേഴ്സ് കളത്തിലിറങ്ങുന്നത്.

കഴിഞ്ഞ ദിവസം 28 അംഗ ടീമിനെ ബ്ലാസ്റ്റേഴ്സ് ഔദ്യോഗികമായി പ്രഖ്യാപിച്ചിരുന്നു. 2013ൽ ഐഎസ്എല്ലിൽ അരങ്ങേറിയതിനുശേഷം മൂന്ന് തവണ ഫൈനലിലെത്തിയെങ്കിലും കിരീടം നേടാൻ ടീമിന് ഇതുവരെ കഴിഞ്ഞിട്ടില്ല. ഇത്തവണ നിരവധി അനിശ്ചിതത്വങ്ങൾക്കുശേഷമാണ് ബ്ലാസ്റ്റേഴ്സ് പുതിയ സീസണിന് തുടക്കമിടുന്നത്.

ലൂണ തിരിച്ചെത്തി; പുതിയ താരങ്ങളുമായി ബ്ലാസ്റ്റേഴ്സ്

ക്യാപ്റ്റൻ അഡ്രിയാൻ ലൂണയുടെ തിരിച്ചുവരവ് ടീമിന് വലിയ പ്രതീക്ഷയാണ് നൽകുന്നത്. നാല് വിദേശ താരങ്ങൾ ഉൾപ്പെടെ 11 പുതിയ കളിക്കാരാണ് ഇത്തവണ ടീമിലെത്തിയത്. ഇന്ത്യൻ യുവതാരം മുഹമ്മദ് സനാനാണ് പുതിയ താരങ്ങളിൽ ശ്രദ്ധേയൻ.

വിദേശ താരങ്ങളിൽ ഗിനിയൻ മുന്നേറ്റ താരം മൊമോ യാൻസെയ്ൻ, ഇംഗ്ലീഷ് താരം ആന്ദ്രേ ഗ്രീൻ, മോണ്ടെനെഗ്രോ താരം നെബോയ്‌സ കൊസൊവിച്ച്, ഇംഗ്ലീഷ് പ്രതിരോധ താരം ജയിംസ് ബോൾട്ടൺ എന്നിവരും ടീമിന്റെ ഭാഗമായിട്ടുണ്ട്.

പരിചയസമ്പന്നനായ ഗോൾകീപ്പർ അമരീന്ദർ സിങ്, മധ്യനിര താരങ്ങളായ മുഹമ്മദ് യാസിർ, പോൾ റാംഫങ്സൗവ, ജോയൽ ലാൽറാമെങ്‌മാവിയ, മുന്നേറ്റ താരം റാംലുൻചുങ്, ഡിഫൻസീവ് മിഡ്ഫീൽഡർ സാഹിൽ ടവോറ എന്നിവരും ഇത്തവണ ബ്ലാസ്റ്റേഴ്സിനായി കളത്തിലിറങ്ങും.

കഴിഞ്ഞ സീസണിൽ പരിശീലകൻ മൈക്കേൽ സ്റ്റാറെയെ പാതിവഴിയിൽ പുറത്താക്കിയ ബ്ലാസ്റ്റേഴ്സ് പകരക്കാരനായി ഇംഗ്ലീഷുകാരനായ ആഷ്‌ലി വെസ്റ്റ്‌വുഡിനെ നിയമിച്ചിരുന്നു. വെസ്റ്റ്‌വുഡിന് കീഴിൽ ടീം മികച്ച പ്രകടനം കാഴ്ചവെച്ചിരുന്നു. പുതിയ സീസണിലും ആ മികവ് തുടരാനാകുമെന്ന പ്രതീക്ഷയിലാണ് ആരാധകർ.

ഐഎസ്എല്ലിൽ മൂന്ന് തവണ ഫൈനലിലെത്തിയിട്ടും കിരീടം കൈവിട്ട ബ്ലാസ്റ്റേഴ്സിന് ഇത്തവണ മികച്ച തുടക്കം നേടാനാകുമോയെന്നാണ് ആരാധകർ ഉറ്റുനോക്കുന്നത്.

ഗോൾകീപ്പർമാർ: അമരീന്ദർ സിങ്, അർഷ് അൻവർ ഷെയ്ഖ്, അൽ സാബിത്ത്.

പ്രതിരോധം: സന്ദീപ് സിങ്, ഹോർമിപാം റുയ്‌വ, ജയിംസ് ബോൾട്ടൺ, ജഗന്നാഥ് ജയൻ, ഐബൻബ ഡോഹ്‌ലിങ്, ബികാഷ് യുംനം, ഫാലൂ എൻഡിയായെ, നവോച്ച സിങ്, അമേയ് റണവാഡെ, സുമിത് ശർമ.

മധ്യനിര: ഫ്രെഡി ലല്ലാവ്‌മ, വിബിൻ മോഹനൻ, അഡ്രിയാൻ ലൂണ, സാഹിൽ ടവോറ, പോൾ റാംഫങ്സൗവ, നെബോയ്‌സ കൊസൊവിച്ച്, ജോയൽ ലാൽറങ്‌മാവിയ, എബിൻദാസ് യേശുദാസൻ.

മുന്നേറ്റനിര: കോറോ സിങ്, ആന്ദ്രേ ഗ്രീൻ, മുഹമ്മദ് സനാൻ, മുഹമ്മദ് യാസിർ, എം.എസ്. ശ്രീക്കുട്ടൻ, റാംലുൻചുങ്, മൊമോ യാൻസെയ്ൻ.

ഇന്റർ കാശിക്കെതിരായ ആദ്യ മത്സരം ജയിച്ച് സീസണിൽ വിജയത്തുടക്കം കുറിക്കുകയാണ് ബ്ലാസ്റ്റേഴ്സിന്റെ ലക്ഷ്യം. പുതിയ താരങ്ങളും തിരിച്ചെത്തിയ ക്യാപ്റ്റൻ അഡ്രിയാൻ ലൂണയും ചേർന്ന് ടീമിന് എത്രത്തോളം കരുത്തുപകരുമെന്നാണ് ആരാധകർ കാത്തിരിക്കുന്നത്.