കൊല്ലം: കുണ്ടറയിൽ കസ്റ്റഡിയിലെടുത്ത് വിട്ടയച്ച യുവാവ് ചികിത്സയ്ക്കിടെ മരിച്ച സംഭവത്തിൽ പോലീസിനെതിരെ ഗുരുതര ആരോപണവുമായി കുടുംബം. സിയാദ് എന്ന യുവാവിന്റെ മരണം കസ്റ്റഡിയിലെ മർദനത്തെ തുടർന്നാണെന്നാണ് കുടുംബത്തിന്റെ പരാതി.
വിദ്യാർഥിയെ കാണാതായെന്ന പരാതിയെ തുടർന്ന് ജൂൺ 16-നാണ് സിയാദിനെ പോലീസ് കസ്റ്റഡിയിലെടുത്തത്. സ്റ്റേഷനിലേക്ക് കൊണ്ടുപോകുന്നതിനിടെ പോലീസ് ക്രൂരമായി മർദിച്ചതായും അതിൽ വാരിയെല്ല് ഉൾപ്പെടെ ഗുരുതരമായി പരിക്കേറ്റതായും കുടുംബം ആരോപിക്കുന്നു.
പരിക്കേറ്റ സിയാദിനെ ആദ്യം കൊല്ലം ജില്ലാ ആശുപത്രിയിലും പിന്നീട് തിരുവനന്തപുരം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ചികിത്സയിലിരിക്കെയാണ് കഴിഞ്ഞ ദിവസം മരണം സംഭവിച്ചത്. തുടർന്ന് പോലീസിനെതിരെ നടപടി ആവശ്യപ്പെട്ട് കുടുംബം രംഗത്തെത്തി.
ഇതിനിടെ, ആരോപണവിധേയനായ സി.പി.ഒ. ശ്രീജിത്തുമായി സിയാദിന്റെ മകൾ നടത്തിയ ഫോൺസംഭാഷണത്തിന്റെ ശബ്ദരേഖ പുറത്തുവന്നു. പിതാവിന് ആരോഗ്യപ്രശ്നങ്ങളുണ്ടെന്ന് പലതവണ അറിയിച്ചിരുന്നുവെന്നും, മർദനത്തെക്കുറിച്ച് പിതാവ് നേരത്തെ തന്നെ പറഞ്ഞിരുന്നുവെന്നുമാണ് ശബ്ദരേഖയിൽ മകൾ പറയുന്നത്.
സംഭവത്തിൽ പ്രതിഷേധിച്ച് ഡി.വൈ.എഫ്.ഐ. കുണ്ടറ പോലീസ് സ്റ്റേഷൻ ഉപരോധിച്ചു. റൂറൽ എസ്.പി. നേരിട്ടെത്തി സംസാരിക്കണമെന്ന ആവശ്യത്തിൽ പ്രതിഷേധക്കാർ ഉറച്ചുനിന്നു. ഡി.വൈ.എസ്.പി. ഉൾപ്പെടെയുള്ള ഉദ്യോഗസ്ഥർ സ്ഥലത്തെത്തിയെങ്കിലും പ്രതിഷേധം തുടർന്നു.
സി.പി.എം. നേതാക്കളായ മേഴ്സിക്കുട്ടിയമ്മയും ചിന്ത ജെറോമും സിയാദിന്റെ വീട് സന്ദർശിച്ച് കുടുംബത്തെ ആശ്വസിപ്പിച്ചു. സംഭവത്തിൽ സമഗ്ര അന്വേഷണം നടത്തി കുറ്റക്കാരായ പോലീസ് ഉദ്യോഗസ്ഥർക്കെതിരെ കർശന നടപടി സ്വീകരിക്കണമെന്നും കുടുംബത്തിന് നഷ്ടപരിഹാരം നൽകണമെന്നും നേതാക്കൾ ആവശ്യപ്പെട്ടു. അന്വേഷണം തൃപ്തികരമല്ലെങ്കിൽ ശക്തമായ പ്രതിഷേധം സംഘടിപ്പിക്കുമെന്നും അവർ മുന്നറിയിപ്പ് നൽകി.
