ന്യൂയോർക്ക്: കോർട്ടിലെ ആരാധനാപാത്രം ആരാണെന്ന് ചോദിച്ചാൽ രണ്ടാമതൊന്ന് ആലോചിക്കേണ്ടതില്ല അർജന്റീന താരം മരിയാനോ നവോനെയ്ക്ക്. ഒറ്റവാക്കിൽ ഉത്തരം പറയും—നൊവാക് ജോക്കോവിച്ച്. 2008ൽ ജോക്കോവിച്ച് ആദ്യ ഗ്രാൻഡ്സ്ലാം കിരീടം നേടിയ ഓസ്ട്രേലിയൻ ഓപ്പൺ മുതൽ തുടങ്ങിയതാണ് നവോനെയുടെ ആരാധന.
കഴിഞ്ഞ വർഷം തന്റെ ആദ്യ ഗ്രാൻഡ്സ്ലാം ടൂർണമെന്റായ ഫ്രഞ്ച് ഓപ്പണിനിടെയാണ് ആരാധനാപാത്രത്തെ നേരിൽ കാണാൻ നവോനിക്ക് അവസരം ലഭിച്ചത്. ജോക്കോവിച്ചിനെ നേരിൽ കണ്ട നിമിഷത്തെക്കുറിച്ച് ചോദിച്ചപ്പോൾ വികാരാധീനനായ താരം പറഞ്ഞത് ഒറ്റ വാക്ക് മാത്രം—’വൗ’. കോർട്ടിൽ താൻ കണ്ടിട്ടുള്ളതിൽ ഏറ്റവും മികച്ച താരമാണ് ജോക്കോവിച്ചെന്നും നവോനെ നേരത്തെ വ്യക്തമാക്കിയിരുന്നു.
എന്നാൽ പതിനെട്ട് വർഷത്തോളം ആരാധിച്ച അതേ താരത്തെ ഇപ്പോൾ കോർട്ടിൽ തോൽപ്പിച്ച് ലോകത്തെ ഞെട്ടിച്ചിരിക്കുകയാണ് നവോനെ. യു.എസ്. ഓപ്പണിന്റെ ആദ്യ റൗണ്ടിൽ 24 ഗ്രാൻഡ്സ്ലാം കിരീടങ്ങളുള്ള ജോക്കോവിച്ചിനെ അട്ടിമറിച്ചതിന് പിന്നാലെ താരത്തിന്റെ പ്രതികരണവും ലളിതമായിരുന്നു—”എന്റെ സ്വപ്നസാഫല്യം.”
മരിയാനോ നവോനിക്ക് ഇത് ആറാമത്തെ ഗ്രാൻഡ്സ്ലാം മത്സരമായിരുന്നു. കഴിഞ്ഞ വർഷത്തെ ഫ്രഞ്ച് ഓപ്പണിൽ മൂന്നാം റൗണ്ടിലെത്തിയതാണ് ഇതിന് മുമ്പുള്ള ഏറ്റവും വലിയ നേട്ടം. ഓസ്ട്രേലിയൻ ഓപ്പണിൽ രണ്ട് തവണയും ആദ്യ റൗണ്ടിൽ തന്നെ പുറത്തായി. കഴിഞ്ഞ വിംബിൾഡണിൽ രണ്ടാം റൗണ്ടിലും 2024ലെ യു.എസ്. ഓപ്പണിൽ രണ്ടാം റൗണ്ടിലും മാത്രമാണ് മുന്നേറാനായത്.
ഇത്തവണ എത്രദൂരം മുന്നേറാനാകുമെന്ന് പ്രവചിക്കാനാകില്ലെങ്കിലും യു.എസ്. ഓപ്പൺ ചരിത്രത്തിലെ തന്നെ ശ്രദ്ധേയമായ അട്ടിമറികളിലൊന്നാണ് നവോനെ സ്വന്തമാക്കിയത്. 39കാരനായ ജോക്കോവിച്ചിൽ പ്രായത്തിന്റെ ചില ലക്ഷണങ്ങൾ പ്രകടമായിരുന്നെങ്കിലും മാസങ്ങൾക്ക് മുമ്പ് ഓസ്ട്രേലിയൻ ഓപ്പണിൽ ഫൈനൽ കളിച്ചതിലൂടെ തന്റെ മികച്ച ഫോമിന്റെ തെളിവ് താരം നൽകിയിരുന്നു.
‘ലാ നവോനെറ്റ’യുടെ കഥ
മരിയാനോ നവോനെയുടെ വിളിപ്പേരായ ‘ലാ നവോനെറ്റ’യ്ക്കും അർജന്റീനയുടെ ഫുട്ബോളുമായി ബന്ധമുണ്ട്. അർജന്റീന ഫുട്ബോൾ പരിശീലകൻ ലയണൽ സ്കലോണിയുടെ വിളിപ്പേരായ ‘ലാ സ്കലോനെറ്റ’യിൽനിന്നാണ് നവോനെയുടെ വിളിപ്പേര് രൂപപ്പെട്ടത്. സ്കലോണിയെപ്പോലെ താൻ പ്രശസ്തനല്ലാത്തതിനാലാണ് ‘ലാ നവോനെറ്റ’ എന്ന പേര് ലോകത്തിന് അത്ര പരിചിതമല്ലാത്തതെന്ന് നവോനെ തമാശയായി പറഞ്ഞിട്ടുണ്ട്. എന്നാൽ ജോക്കോവിച്ചിനെതിരായ ചരിത്രവിജയത്തോടെ ടെന്നിസ് ലോകത്ത് ആ പേര് ഇപ്പോൾ കൂടുതൽ ശ്രദ്ധേയമായിരിക്കുകയാണ്.
ബ്യൂണസ് ഏറീസിലെ ക്ലബ് അത്ലറ്റിക്കോയിൽ മൂന്നാം വയസ്സിലാണ് നവോനെ ടെന്നിസ് പരിശീലനം ആരംഭിച്ചത്. 2018ൽ പ്രൊഫഷണൽ ടെന്നിസിൽ സജീവമായി. ഐ.ടി.എഫ് ഫ്യൂച്ചേഴ്സിലും എ.ടി.പി ചാലഞ്ചേഴ്സിലും മികവ് തെളിയിച്ച താരം 2023ലാണ് കരിയറിൽ വലിയ മുന്നേറ്റം നടത്തിയത്. പൊസ്നാൻ, സാന്താഫെ, ബ്യൂണസ് ഏറീസ്, സാന്താക്രൂസ് കിരീടങ്ങൾ സ്വന്തമാക്കി ലോക റാങ്കിങ്ങിൽ ആദ്യ 125ൽ ഇടം നേടി.
2024ലായിരുന്നു എ.ടി.പി ടൂറിലെ വലിയ ബ്രേക്ക്ത്രൂ. റിയോ ഡി ജെനീറോയിൽ നടന്ന എ.ടി.പി 500 ടൂർണമെന്റിൽ യോഗ്യത നേടി ഫൈനലിലെത്തിയ നവോനെ, യോഗ്യതാ റൗണ്ടിലൂടെ എത്തിയശേഷം എ.ടി.പി 500 ഫൈനലിലെത്തുന്ന ആദ്യ താരമെന്ന നേട്ടവും സ്വന്തമാക്കി. ഫൈനലിൽ സെബാസ്റ്റ്യൻ ബയേസിനോട് തോറ്റു. അതേ വർഷം ഫ്രഞ്ച് ഓപ്പണിന്റെ മെയിൻ ഡ്രോയിലേക്ക് നേരിട്ട് യോഗ്യത നേടുകയും ലോക റാങ്കിങ്ങിൽ 29-ാം സ്ഥാനത്തെത്തുകയും ചെയ്തു.
ഈ വർഷമാണ് നവോനെ തന്റെ ആദ്യ എ.ടി.പി ടൂർ കിരീടം സ്വന്തമാക്കിയത്. ബുക്കാറെസ്റ്റിലെ ടിരിയാക് ഓപ്പൺ ഫൈനലിൽ ഡാനിൽ മെദ്വെദേവിനെ തോൽപ്പിച്ചാണ് താരം കിരീടം നേടിയത്.
ഇപ്പോഴിതാ ലോക ടെന്നിസിലെ ഏറ്റവും വലിയ താരങ്ങളിലൊരാളായ ജോക്കോവിച്ചിനെയും ഗ്രാൻഡ്സ്ലാം വേദിയിൽ വീഴ്ത്തിയിരിക്കുന്നു. ഒരു ഗ്രാൻഡ്സ്ലാം ടൂർണമെന്റിൽ രണ്ടാം റൗണ്ടിന് മുമ്പ് ജോക്കോവിച്ച് പുറത്താകുന്നത് ഇതിന് മുമ്പ് രണ്ട് തവണ മാത്രമാണ്.
ചരിത്രത്തിലെ വമ്പൻ അട്ടിമറികളുടെ പട്ടികയിൽ
ഗ്രാൻഡ്സ്ലാം ചരിത്രത്തിലെ തന്നെ ഏറ്റവും വലിയ അട്ടിമറികളുടെ നിരയിലാണ് നവോനെയുടെ ജോക്കോവിച്ചിനെതിരായ വിജയം. 2009 ഫ്രഞ്ച് ഓപ്പണിൽ റഫേൽ നദാലിനെ റോബിൻ സോഡെർലിങ് വീഴ്ത്തിയതും 2012 വിംബിൾഡണിൽ ലൂക്കാസ് റോസോൾ നദാലിനെ തോൽപ്പിച്ചതും 2014 വിംബിൾഡണിൽ 19കാരനായ വൈൽഡ് കാർഡ് താരം നിക്ക് കിർഗിയോസ് നദാലിനെ അട്ടിമറിച്ചതും ടെന്നിസ് ചരിത്രത്തിലെ വിഖ്യാത അട്ടിമറികളാണ്.
2002 വിംബിൾഡണിൽ ജോർജ് ബാസ്റ്റൽ പീറ്റ് സാംപ്രസിനെ രണ്ടാം റൗണ്ടിൽ വീഴ്ത്തിയതും 1996ലെ വിംബിൾഡണിൽ റിച്ചാർഡ് ക്രായിച്ചെക്ക് ക്വാർട്ടർ ഫൈനലിൽ സാംപ്രസിനെ തോൽപ്പിച്ചതും 1987ൽ പീറ്റർ ദൂഹാൻ ബോറിസ് ബെക്കറെ രണ്ടാം റൗണ്ടിൽ അട്ടിമറിച്ചതും 2013ൽ സെർജി സ്റ്റഖോവ്സ്കി റോജർ ഫെഡററെ രണ്ടാം റൗണ്ടിൽ വീഴ്ത്തിയതുമെല്ലാം ഇതേ നിരയിലെ ചരിത്രവിജയങ്ങളാണ്.
ഇപ്പോൾ ആ പട്ടികയിൽ പുതിയൊരു പേര് കൂടി—മരിയാനോ നവോനെ. ഒരിക്കൽ ആരാധനയോടെ നേരിൽ കണ്ട് കണ്ണുനിറഞ്ഞ ജോക്കോവിച്ചിനെ, വർഷങ്ങൾക്കിപ്പുറം അതേ ഗ്രാൻഡ്സ്ലാം വേദിയിൽ തോൽപ്പിച്ചാണ് അർജന്റീന താരം തന്റെ പേര് ടെന്നിസ് ചരിത്രത്തിൽ എഴുതിച്ചേർത്തത്.
