കൊച്ചി: എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശൻ പ്രതിയായ മൈക്രോ ഫിനാൻസ് തട്ടിപ്പ് കേസിൽ അന്വേഷണം പൂർത്തിയാക്കാൻ ഹൈക്കോടതി ഒരു മാസം കൂടി സമയം അനുവദിച്ചു. ഇത് അവസാന അവസരമാണെന്നും കോടതി മുന്നറിയിപ്പ് നൽകി.
അതേസമയം, കേസിലെ അന്വേഷണ ഉദ്യോഗസ്ഥനെ മാറ്റണമെന്ന ഹർജിയിൽ പ്രോസിക്യൂഷൻ കൂടുതൽ സമയം ആവശ്യപ്പെട്ടു. എസ്.പി.എസ്. ശശിധരനെ അന്വേഷണത്തിൽ നിന്ന് മാറ്റണമെന്നാണ് ഹർജിയിലെ ആവശ്യം.
അന്വേഷണം അനാവശ്യമായി നീണ്ടുപോകുകയാണെന്നും ശരിയായ രീതിയിലല്ല നടക്കുന്നതെന്നും ഹർജിയിൽ ആരോപിക്കുന്നു. അന്വേഷണത്തിൽ നേരത്തെ കോടതി അതൃപ്തി പ്രകടിപ്പിച്ചതിനെ തുടർന്നാണ് കേസിലെ കക്ഷിയായ എം.എസ്. അനിൽ ഹൈക്കോടതിയെ സമീപിച്ചത്. കേസിൽ വെള്ളാപ്പള്ളി നടേശനെ പ്രതിയാക്കിയ ഒരു കേസിലെ അന്വേഷണം ഇതിനകം പൂർത്തിയായിട്ടുണ്ട്.
2016-ൽ വി.എസ്. അച്യുതാനന്ദൻ നൽകിയ പരാതിയെ തുടർന്നാണ് കേസ് രജിസ്റ്റർ ചെയ്തത്. സ്ത്രീകളുടെ പേരിൽ വ്യാജ പദ്ധതി നടപ്പാക്കി പിന്നോക്ക വികസന കോർപ്പറേഷനിൽ നിന്ന് കോടിക്കണക്കിന് രൂപ വായ്പയെടുത്ത് സാമ്പത്തിക ക്രമക്കേട് നടത്തിയെന്നാണ് ആരോപണം. സാമ്പത്തിക തട്ടിപ്പും ഗൂഢാലോചനയും വഴി 15 കോടി രൂപ തട്ടിയെടുത്തെന്നാണ് പരാതിയിൽ പറയുന്നത്.
