തിരുവനന്തപുരം: ഇഡി നടത്തിയ എട്ട് മണിക്കൂർ നീണ്ട പരിശോധനയ്ക്ക് പിന്നാലെ മുൻ മുഖ്യമന്ത്രി പിണറായി വിജയൻ ഫേസ്ബുക്കിൽ പുതിയ ചിത്രം പങ്കുവെച്ച് പ്രവർത്തകരെ അഭിവാദ്യം ചെയ്തു.

തിരുവനന്തപുരം ബേക്കറി ജംഗ്ഷനിലെ വാടക വീട്ടിൽ നടന്ന പരിശോധനയ്ക്ക് ശേഷം, “ഇതുകൊണ്ട് തളർത്താനാകില്ല” എന്ന സന്ദേശത്തോടെയാണ് മുഷ്ടി ചുരുട്ടി നിൽക്കുന്ന ചിത്രമാണ് അദ്ദേഹം പോസ്റ്റ് ചെയ്തത്. ചിത്രത്തിൽ സിപിഎം സംസ്ഥാന സെക്രട്ടറി എം വി ഗോവിന്ദൻ ഉൾപ്പെടെയുള്ള നേതാക്കളും ഉണ്ടായിരുന്നു.

പരിശോധനയിൽ ഒന്നും കണ്ടെത്താനായില്ലെന്ന് ഉദ്യോഗസ്ഥർ രേഖാമൂലം നൽകിയതായും റിപ്പോർട്ടുകൾ പറയുന്നു. ഇതിന് പിന്നാലെ പ്രവർത്തകർ സാമൂഹ്യമാധ്യമങ്ങളിൽ പിന്തുണയുമായി രംഗത്തെത്തി.

അതേസമയം, ED ഉദ്യോഗസ്ഥർ മടങ്ങുന്നതിനിടെ സംഘർഷാവസ്ഥയും ഉണ്ടായി. ഉദ്യോഗസ്ഥരുടെ വാഹനത്തിന് നേരെ ആക്രമണം നടന്നതായും, വാഹനത്തിന്റെ ചില്ലുകൾ തകർത്തതായും റിപ്പോർട്ടുണ്ട്. പൊലീസും പ്രതിഷേധക്കാരും തമ്മിൽ ഏറ്റുമുട്ടലുണ്ടായതിനെ തുടർന്ന് പൊലീസ് ലാത്തിച്ചാർജ് നടത്തി.