തിരുവനന്തപുരം: യുഡിഎഫ് കൺവീനർ അടൂർ പ്രകാശിനെതിരെ രൂക്ഷ വിമർശനവുമായി കോൺഗ്രസ് എംപി രാജ്മോഹൻ ഉണ്ണിത്താൻ. കൺവീനർ എന്ന പദവിക്ക് നിരക്കാത്ത നടപടിയാണ് അടൂർ പ്രകാശ് നടത്തിയതെന്ന് അദ്ദേഹം ആരോപിച്ചു. സർക്കാരിനെ പ്രതിരോധിക്കേണ്ട കൺവീനർ വാർത്താസമ്മേളനം വിളിച്ച് പരസ്യമായി വിമർശനം ഉന്നയിച്ചത് ശരിയായില്ലെന്നും ഉണ്ണിത്താൻ പറഞ്ഞു.
പാർട്ടി ഫോറങ്ങളിൽ ഉന്നയിക്കേണ്ട വിഷയങ്ങൾ വാർത്താസമ്മേളനത്തിലൂടെ പറയുന്നത് ശരിയായ രീതിയല്ലെന്നും അദ്ദേഹം വ്യക്തമാക്കി. സംസ്ഥാനത്ത് നടക്കുന്ന നിയമനങ്ങളിൽ തനിക്കും അഭിപ്രായങ്ങളുണ്ടെന്നും എന്നാൽ സർക്കാരിനെ പ്രതിരോധത്തിലാക്കുന്ന തരത്തിലുള്ള പരസ്യ പ്രതികരണങ്ങൾ ഉചിതമല്ലെന്നും ഉണ്ണിത്താൻ പറഞ്ഞു.
നിലവിൽ കോൺഗ്രസിന് ശക്തമായ പാർട്ടി നേതൃത്വം ആവശ്യമാണെന്നും കെപിസിസി പുനഃസംഘടിപ്പിക്കണമെന്നും അദ്ദേഹം ആവശ്യപ്പെട്ടു. നിലവിലെ കെപിസിസി പ്രസിഡന്റ് തുടരാൻ താൽപര്യമില്ലെന്ന് വ്യക്തമാക്കിയാൽ മാത്രം പോരെന്നും ഇക്കാര്യം രേഖാമൂലം അറിയിക്കണമെന്നും അപ്പോൾ നേതൃത്വം തീരുമാനമെടുക്കുമെന്നും രാജ്മോഹൻ ഉണ്ണിത്താൻ പറഞ്ഞു.
രാഷ്ട്രീയകാര്യ സമിതി യോഗത്തിൽ അടൂർ പ്രകാശ് ഇക്കാര്യത്തിൽ സംസാരിച്ചതായി അറിയില്ലെന്നും ഉണ്ണിത്താൻ പറഞ്ഞു. കെപിസിസിക്ക് എന്തെങ്കിലും പരാതിയുണ്ടെങ്കിൽ അത് പ്രസിഡന്റാണ് ഉന്നയിക്കേണ്ടതെന്നും യുഡിഎഫ് കൺവീനറല്ലെന്നും അദ്ദേഹം വ്യക്തമാക്കി.
സർക്കാരിനെക്കുറിച്ച് പരാതികളുണ്ടെങ്കിൽ എഐസിസി നേതൃത്വത്തെ അറിയിക്കാം. പറയാനുള്ള കാര്യങ്ങൾ പറയേണ്ട വേദിയിൽ പറയാനുള്ള ധൈര്യം കാണിക്കണമെന്നും അനവസരത്തിൽ മാധ്യമങ്ങളോട് പറയുന്നത് ഒഴിവാക്കണമെന്നും ഉണ്ണിത്താൻ പറഞ്ഞു.
കെപിസിസി ആസ്ഥാനത്ത് നടത്തിയ വാർത്താസമ്മേളനത്തിലാണ് മുഖ്യമന്ത്രി വി.ഡി. സതീശനെതിരെ അടൂർ പ്രകാശ് വിമർശനം ഉന്നയിച്ചത്. യുഡിഎഫ് യോഗം അടുത്ത കാലത്തൊന്നും നടന്നിട്ടില്ലെന്നും യോഗം വിളിക്കാൻ മുഖ്യമന്ത്രി മുൻകൈ എടുക്കേണ്ടതുണ്ടെന്നും അദ്ദേഹം പറഞ്ഞിരുന്നു.
പല കാര്യങ്ങളും ചർച്ചയോ കൂടിയാലോചനയോ ഇല്ലാതെയാണ് തീരുമാനിക്കുന്നതെന്നും ഉപതെരഞ്ഞെടുപ്പിൽ ഏകോപനക്കുറവുണ്ടായെന്നും അടൂർ പ്രകാശ് ആരോപിച്ചിരുന്നു. അർഹരായവർക്ക് സ്ഥാനങ്ങൾ ലഭിക്കേണ്ടതുണ്ടെന്നും അദ്ദേഹം പറഞ്ഞു.
യുഡിഎഫിനെക്കുറിച്ചുള്ള ചോദ്യങ്ങൾക്ക് കൃത്യമായി മറുപടി പറയാൻ കഴിയാത്ത സാഹചര്യമുണ്ടെന്നതിൽ ഖേദമുണ്ടെന്നും പല വിഷയങ്ങളിലും അഭിപ്രായവ്യത്യാസങ്ങൾ ഉണ്ടാകുമ്പോൾ നേതൃത്വത്തെ അറിയിക്കുകയാണ് പതിവെന്നും അടൂർ പ്രകാശ് വ്യക്തമാക്കിയിരുന്നു. തന്നെ ചുമതലപ്പെടുത്തിയത് എഐസിസിയാണെന്നും അദ്ദേഹം ചൂണ്ടിക്കാട്ടി.
എന്നാൽ, തന്റെ വിമർശനം സ്വന്തം അനുഭവത്തിന്റെ വെളിച്ചത്തിലുള്ളതാണെന്നും ആരുടെയും പിന്തുണ തേടിയിട്ടില്ലെന്നും അടൂർ പ്രകാശ് പിന്നീട് വ്യക്തമാക്കി. നാല് മാസത്തിനിടെ യുഡിഎഫ് യോഗം ഒരു തവണ മാത്രമാണ് ചേർന്നതെന്നും പറഞ്ഞ കാര്യങ്ങളിൽ ഉറച്ചുനിൽക്കുകയാണെന്നും അദ്ദേഹം പറഞ്ഞു. തന്റെ പരാതി എഐസിസിയെ അറിയിക്കുമെന്നും അടൂർ പ്രകാശ് വ്യക്തമാക്കിയിട്ടുണ്ട്.
