തിരുവനന്തപുരം: 2026ലെ നിയമസഭാ തിരഞ്ഞെടുപ്പിൽ ചിറയിൻകീഴ് നിയോജക മണ്ഡലത്തിൽ യുഡിഎഫ് സ്ഥാനാർഥി രമ്യ ഹരിദാസ് വിജയം നേടി. 1,422 വോട്ടുകളുടെ നേരിയ ഭൂരിപക്ഷത്തിലാണ് അവരുടെ ജയം. രമ്യ ഹരിദാസ് 56,833 വോട്ടുകൾ നേടിയപ്പോൾ എൽഡിഎഫ് സ്ഥാനാർഥി മനോജ് എടമന 55,411 വോട്ടുകളും ബിജെപി സ്ഥാനാർഥി 32,920 വോട്ടുകളും നേടി.
ചിറയിൻകീഴ് താലൂക്കിലെ അഞ്ചുതെങ്ങ്, അഴൂർ, ചിറയിൻകീഴ്, കടയ്ക്കാവൂർ, കിഴുവിലം, മുദാക്കൽ എന്നീ പഞ്ചായത്തുകളും തിരുവനന്തപുരം താലൂക്കിലെ കഠിനംകുളം, മംഗലപുരം എന്നീ പഞ്ചായത്തുകളും ഉൾപ്പെടുന്നതാണ് ചിറയിൻകീഴ് മണ്ഡലം. പട്ടികജാതി സംവരണ മണ്ഡലമായ ഇത് ദീർഘകാലമായി സിപിഐയുടെ ശക്തികേന്ദ്രമായാണ് അറിയപ്പെടുന്നത്.
2011 മുതൽ സിപിഐ നേതാവ് വി. ശശിയാണ് മണ്ഡലത്തെ പ്രതിനിധീകരിച്ച് വരുന്നത്. 2021ലെ നിയമസഭാ തിരഞ്ഞെടുപ്പിൽ അദ്ദേഹം 14,017 വോട്ടുകളുടെ ഭൂരിപക്ഷത്തിൽ വിജയിച്ചിരുന്നു. അന്ന് ശശി 62,634 വോട്ടുകൾ നേടിയപ്പോൾ യുഡിഎഫ് സ്ഥാനാർഥി ബി.എസ്. അനൂപിന് 48,617 വോട്ടുകളും ബിജെപി സ്ഥാനാർഥി ജി.എസ്. ആശാനാഥിന് 30,986 വോട്ടുകളും ലഭിച്ചിരുന്നു.
ഇത്തവണ കോൺഗ്രസിന്റെ സ്ഥാനാർഥി നിർണയം തന്നെ മണ്ഡലത്തിൽ വിവാദങ്ങൾക്ക് കാരണമായി. മണ്ഡലത്തിന് പുറത്തുനിന്നുള്ള സ്ഥാനാർഥിയെ പരിഗണിച്ചതിനെതിരെ പാർട്ടിക്കുള്ളിൽ തന്നെ പ്രതിഷേധങ്ങൾ ഉയർന്നു. ദലിത് സ്ഥാനാർഥികൾ ഉണ്ടായിരിക്കെ പുറത്തുനിന്ന് സ്ഥാനാർഥിയെ ഇറക്കേണ്ടതില്ലെന്ന നിലപാടും ഒരു വിഭാഗം പ്രവർത്തകർ ഉയർത്തി. ഈ വിവാദങ്ങൾക്കിടയിലും കടുത്ത മത്സരത്തിനൊടുവിലാണ് യുഡിഎഫ് ചെറിയ ഭൂരിപക്ഷത്തിൽ വിജയം നേടിയത്.
