ദൈനംദിന ജീവിതത്തിലെ ഈ അഞ്ച് ശീലങ്ങൾ ഒഴിവാക്കാതെ നിങ്ങളുടെ കുടവയർ കുറയാൻ പോകുന്നില്ലെന്നാണ് ആരോഗ്യ വിദഗ്ധർ പറയുന്നത്.
നമ്മുടെ ഭക്ഷണശീലം ഒരു ഘടകമാണ്. നമ്മുടെ ചോറ് കഴിക്കുന്ന ശീലം നമ്മളറിയാതെ തന്നെ ശരീരത്തിൽ കാർബോഹൈഡ്രേറ്റ് വർധിക്കാൻ കാരണമാകുന്നുണ്ട്. അമിത കാർബോഹൈഡ്രേറ്റ് ശരീരത്തിൽ ഗ്ലൂക്കോസായി മാറുന്നു. ഇത് ഊർജമായി ഉപയോഗിക്കപ്പെട്ടില്ലെങ്കിൽ ശരീരത്തിൽ കൊഴുപ്പായി സംഭരിക്കപ്പെടുകയും ഇത് തടിയും വയറും കൂടാൻ കാരണമാവുകയും ചെയ്യുന്നു.
മാനസിക സമ്മർദം ശരീരത്തിന്റെ രാസഘടനയിൽ മാറ്റങ്ങൾ വരുത്തും. ഉറക്കക്കുറവ്, സമ്മർദം നിറഞ്ഞ ജോലി ശൈലി, തെറ്റായ ഭക്ഷണരീതി എന്നിവ കോർട്ടിസോളിന്റെ അളവ് കൂട്ടും. ഇത് വയറിന് ചുറ്റും കൊഴുപ്പ് അടിഞ്ഞുകൂടുന്ന അളവു വർധിപ്പിക്കും. ആരോഗ്യകരമായ ഭക്ഷണം കഴിച്ചിട്ടും ഉറക്കം കുറഞ്ഞാലും സമ്മർദം കൂടിയാലും വയറ്റിലെ കൊഴുപ്പ് വർധിക്കാൻ കാരണമാകും.
മണിക്കൂറുകളോളം ഒറ്റയിരിപ്പ് ഇരിക്കുന്നവർ സൂക്ഷിക്കുക. ഒരു ദിവസവും 8-10 മണിക്കൂർ വരെ ഇരുന്ന് ജോലി ചെയ്യുന്നത് മെറ്റബോളിസത്തെ മന്ദഗതിയിലാക്കുന്നു. ഇത് നിങ്ങൾ കഴിക്കുന്ന കലോറി കത്തിക്കുന്നതിന് ശരീരത്തിന് സമ്മർദം കൂടുന്നു. ഇത് കുടവയറു കൂടാൻ കാരണമാകും.
വ്യായാമം തീരെയില്ലാത്തവർക്കും പ്രശ്നമാണ്. വേഗത്തിലുള്ള നടത്തം, ജോഗിങ്, സൈക്കിളിങ് പോലെ ഹൃദയമിടിപ്പ് കൂട്ടുന്ന കാർഡിയോ വ്യായാമങ്ങൾ ദിവസവും കുറഞ്ഞത് 40 മിനിറ്റെങ്കിലും ചെയ്യേണ്ടതുണ്ട്. വെറുതെ സാവധാനത്തിൽ നടക്കുന്നതുകൊണ്ട് മാത്രം ഈ കൊഴുപ്പ് കുറയുകയില്ല. അതിന്, ശരീരം വിയർക്കുന്ന തരത്തിലുള്ള വ്യായാമം വേണം.
ഉറക്കം കുറയുന്നത് നിങ്ങളുടെ വിശപ്പ് ഹോർമോണുകളുടെ പ്രവർത്തനം തകിടം മറിക്കുന്നു. ഇത് ഗ്രെലിൻ (വിശപ്പ് ഹോർമോൺ) വർധിപ്പിക്കുകയും, ലെപ്റ്റിൻ (പൂർണത നൽകുന്ന ഹോർമോൺ) കുറയ്ക്കുകയും ചെയ്യുന്നു. ഇത് ശരീരഭാരവും കുടവയറും വർധിക്കാൻ കാരണമാകുന്നു.
സംസ്കരിച്ച ഭക്ഷണം അമിതമായി കഴിക്കുന്ന ശീലം ദഹനം മന്ദഗതിയിലാക്കുകയും, ഭക്ഷണത്തോടുള്ള ആസക്തി വർധിപ്പിക്കുകയും ചെയ്യുന്നു. ഇത് ശരീരത്തിൽ കൊഴുപ്പ് അടിഞ്ഞുകൂടാൻ കാരണമാകും.
