തിരുവനന്തപുരം: സംസ്ഥാന സ്കൂള് കായികമേളയ്ക്ക് തിരുവനന്തപുരത്ത് തുടക്കമായി. ധനമന്ത്രി കെ എന് ബാലഗോപാല് കായിക മേള ഉദ്ഘാടനം ചെയ്തു. മുന് ഇന്ത്യന് ഫുട്ബോള് താരം ഐഎം വിജയനും മന്ത്രി വി ശിവന് കുട്ടിയും ചേര്ന്ന് ദീപശിഖ തെളിയിച്ചു. കായിക മേളയില് തീം സോങും അവതരിപ്പിച്ചു. ഇതാദ്യമായാണ് സ്കൂള് കായിക മേളയില് തീം സോങ് അവതരിപ്പിക്കുന്നത്. കായിക മേളയില് നടന്ന മാര്ച്ച് പാസ്റ്റില് കോഴിക്കോട് ജില്ലയ്ക്ക് ഒന്നാം സ്ഥാനവും, വയനാടിന് രണ്ടാം സ്ഥാനവും കണ്ണൂരിന് മൂന്നാം സ്ഥാനവും ലഭിച്ചു.
ഏഴ് നാള് പന്ത്രണ്ട് വേദികളിലായാണ് മത്സരങ്ങള് നടക്കുക. ഇരുപതിനായിരത്തോളം കുട്ടികളാണ് മത്സരത്തിനിറങ്ങുക. സെന്ട്രല് സ്റ്റേഡിയത്തിലും ചന്ദ്രശേഖരന് നായര് സ്റ്റേഡിയത്തിലുമായാണ് മത്സരങ്ങള് നടക്കുക. പ്രത്യേക പരിഗണന അര്ഹിക്കുന്ന കുട്ടികള്ക്കായി ഇന്ക്ലൂസീവ് സ്പോര്ട്സ് ഇനങ്ങളുമുണ്ട്. അതില് 1944 കുട്ടികളാണ് മത്സരിക്കുന്നത്. ഗള്ഫിലെ ഏഴ് സ്കൂളുകളില് നിന്ന് 39 കുട്ടികളും മത്സരത്തിനുണ്ട്. വിജയികള്ക്ക് ഇതാദ്യമായി 117.5 പവന്റെ സ്വര്ണക്കപ്പും സമ്മാനിക്കും. പുത്തരിക്കണ്ടത്താണ് ഭക്ഷണശാല. ഒരേ സമയം കാല് ലക്ഷത്തോളം പേര്ക്ക് കഴിക്കാം. പഴയിടം മോഹനന് നമ്പൂതിരിയുടെ നേതൃത്വത്തിലാണ് പാചകം. സഞ്ജു സാംസണും കീര്ത്തി സുരേഷുമാണ് മേളയുടെ അംബാസഡര്മാര്. നാളെ മുതല് മത്സരങ്ങള് തുടങ്ങും. 23നാണ് ട്രാക്ക് മത്സരങ്ങള് തുടങ്ങുക
