കൊച്ചി: കത്രിക്കടവിലുള്ള അൽ റീം ഹോട്ടലിൽ നിന്ന് ഭക്ഷണം കഴിച്ച ചിലർക്കു ഷിഗെല്ല ബാക്ടീരിയ ബാധ സ്ഥിരീകരിച്ചു. ആശുപത്രിയിൽ ചികിത്സ തേടിയവരിൽ മൂന്ന് പേരുടെ പരിശോധനാ ഫലത്തിലാണ് ഷിഗെല്ല കണ്ടെത്തിയത്. ജില്ലാ മെഡിക്കൽ ഓഫീസർ ഡോ. ആർ. ഷയിർഷയാണ് ഇക്കാര്യം അറിയിച്ചത്.
ഈ മാസം 10, 11 തീയതികളിൽ ഹോട്ടലിൽ നിന്ന് ഭക്ഷണം കഴിച്ച നിരവധി ആളുകൾക്ക് ഛർദി, വയറിളക്കം തുടങ്ങിയ ആരോഗ്യപ്രശ്നങ്ങൾ ഉണ്ടായി. ആദ്യ രണ്ട് ദിവസങ്ങളിൽ ഏകദേശം 32 പേർ ആശുപത്രിയിൽ പ്രവേശിപ്പിക്കപ്പെട്ടു. പിന്നീട് എട്ട് പേർ കൂടി ചികിത്സ തേടി. ആശുപത്രിയിൽ പ്രവേശിപ്പിച്ച ആദ്യ 15 പേരുടെ സാമ്പിളുകൾ പരിശോധിച്ചപ്പോഴാണ് മൂന്ന് പേർക്ക് ഷിഗെല്ല ബാധ സ്ഥിരീകരിച്ചത്. പൊന്നുരുന്നി, നെട്ടൂർ, മലയിടം തുരുത്ത് സ്വദേശികളായ മൂന്ന് പേരുടെ പരിശോധനാ ഫലമാണ് പോസിറ്റീവായത്.
സംഭവത്തെ തുടർന്ന് ഭക്ഷ്യസുരക്ഷാ വകുപ്പ് ഹോട്ടലിൽ പരിശോധന നടത്തി. ഭക്ഷണസാമ്പിളുകൾ ശേഖരിച്ച ശേഷം ഹോട്ടൽ താൽക്കാലികമായി അടച്ചുപൂട്ടാൻ നിർദേശം നൽകി. പൂണിത്തുറ സ്വദേശി ടോണി പീറ്റർ നൽകിയ പരാതിയുടെ അടിസ്ഥാനത്തിൽ നോർത്ത് പൊലീസ് ഹോട്ടലിനെതിരെ കേസെടുത്തു. പൊലീസ് ഹോട്ടലിൽ പരിശോധനയും നടത്തി.
അതേസമയം, ഹോട്ടൽ അധികൃതർ തങ്ങൾ ശുചിത്വം പാലിച്ചാണ് പ്രവർത്തിക്കുന്നതെന്നും കോർപ്പറേഷൻ വിതരണം ചെയ്ത വെള്ളത്തിൽ നിന്നാകാം രോഗബാധ ഉണ്ടായതെന്നുമാണ് വിശദീകരിക്കുന്നത്.
സംഭവത്തിൽ പ്രതിഷേധവുമായി വിവിധ സംഘടനകളും രാഷ്ട്രീയ പാർട്ടികളും ഹോട്ടലിന് മുന്നിൽ പ്രതിഷേധം സംഘടിപ്പിച്ചിരുന്നു. ഭക്ഷ്യവിഷബാധയുടെ യഥാർത്ഥ കാരണം കണ്ടെത്താൻ ആരോഗ്യവകുപ്പും മറ്റ് ബന്ധപ്പെട്ട വകുപ്പുകളും അന്വേഷണം തുടരുകയാണ്.
