കൊല്ലം: സംസ്ഥാനത്തെ എല്ലാ അഭയകേന്ദ്രങ്ങളിലും വ്യാപക പരിശോധന നടത്താൻ സാമൂഹികനീതി വകുപ്പ് നിർദേശം നൽകി. അംഗീകാരമില്ലാതെ പ്രവർത്തിക്കുന്ന സ്ഥാപനങ്ങൾ അടച്ചുപൂട്ടാനും നടപടി സ്വീകരിക്കും. കൊല്ലം തെന്മലയ്ക്ക് സമീപമുള്ള വെള്ളിമല ക്ഷേത്രഗിരി അഭയകേന്ദ്രത്തിൽ വയോധികയെ ലൈംഗികമായി പീഡിപ്പിച്ച കേസിൽ നടത്തിപ്പുകാരൻ അറസ്റ്റിലായ പശ്ചാത്തലത്തിലാണ് തീരുമാനം.
കുട്ടികൾ, വയോധികർ, മാനസിക വെല്ലുവിളികൾ നേരിടുന്നവർ തുടങ്ങിയവരെ പാർപ്പിക്കുന്ന നിരവധി അഭയകേന്ദ്രങ്ങൾ സംസ്ഥാനത്ത് പ്രവർത്തിക്കുന്നുണ്ട്. ഇവയിൽ ചിലത് ആവശ്യമായ അംഗീകാരമോ ലൈസൻസോ ഇല്ലാതെയാണെന്ന സംശയമുണ്ട്. പരിശോധനയിൽ നിയമലംഘനം കണ്ടെത്തുന്ന സ്ഥാപനങ്ങൾ പൂട്ടുകയും അവിടെയുള്ള അന്തേവാസികളെ സുരക്ഷിത കേന്ദ്രങ്ങളിലേക്ക് മാറ്റുകയും ചെയ്യും.
ഓർഫനേജ് കൺട്രോൾ ബോർഡിന്റെ മേൽനോട്ടത്തിൽ സാമൂഹികനീതി വകുപ്പും വനിതാ-ശിശു വികസന വകുപ്പും ചേർന്നാണ് അഭയകേന്ദ്രങ്ങൾക്ക് പ്രവർത്തനാനുമതി നൽകുന്നത്. തുടർ പരിശോധനകളും നിയമനടപടികളും സാമൂഹികനീതി വകുപ്പും ഓർഫനേജ് കൺട്രോൾ ബോർഡും സംയുക്തമായി നടത്തുമെന്ന് മന്ത്രി ബിന്ദു കൃഷ്ണ അറിയിച്ചു.
