ലഖ്നൗ: ഉത്തർപ്രദേശിലെ സമാജ്വാദി പാർട്ടിയിൽ (എസ്പി) വലിയ പിളർപ്പിന് സാധ്യതയുണ്ടെന്ന് ബിജെപി സഖ്യകക്ഷിയും സുഹേൽദേവ് ഭാരതീയ സമാജ് പാർട്ടി അധ്യക്ഷനുമായ ഓംപ്രകാശ് രാജ്ഭാർ. നിരവധി എസ്പി നേതാക്കൾ ബിജെപിയിൽ ചേരാൻ തയ്യാറായിട്ടുണ്ടെന്നും അദ്ദേഹം അവകാശപ്പെട്ടു.
എസ്പി നേതാവ് രാംഗോപാൽ യാദവ് കേന്ദ്ര ആഭ്യന്തര മന്ത്രി അമിത് ഷായ്ക്ക് കത്ത് നൽകിയിട്ടുണ്ടെന്നും രാജ്ഭാർ എക്സിലൂടെ ആരോപിച്ചു. ഖനന കുംഭകോണവും ഗോമതി റിവർഫ്രണ്ട് പദ്ധതിയിലെ അഴിമതിയും സംബന്ധിച്ച വിവാദങ്ങൾ ചൂണ്ടിക്കാട്ടിയാണ് അദ്ദേഹത്തിന്റെ പ്രതികരണം. എന്നാൽ ആരോപണത്തിന് തെളിവുകളോ കൂടുതൽ വിശദാംശങ്ങളോ അദ്ദേഹം പുറത്തുവിട്ടിട്ടില്ല.
“സമാജ്വാദി പാർട്ടിയിൽ വലിയൊരു പിളർപ്പ് സംഭവിക്കാൻ പോകുന്നു. മഹാരാഷ്ട്രയും ബംഗാളും മറക്കുക, മുഴുവൻ എസ്പിയും ബിജെപിയിലേക്ക് വരാൻ തയ്യാറായിരിക്കുകയാണ്,” എന്നാണ് രാജ്ഭാറിന്റെ അവകാശവാദം.
ഉത്തർപ്രദേശിൽ ബിജെപി നയിക്കുന്ന എൻഡിഎയുടെ പ്രധാന സഖ്യകക്ഷിയാണ് രാജ്ഭാറിന്റെ പാർട്ടി. അതേസമയം, അദ്ദേഹത്തിന്റെ ആരോപണങ്ങളോട് സമാജ്വാദി പാർട്ടി ഇതുവരെ പ്രതികരിച്ചിട്ടില്ല.
പശ്ചിമ ബംഗാളിൽ തൃണമൂൽ കോൺഗ്രസിലും മഹാരാഷ്ട്രയിൽ ഉദ്ധവ് താക്കറെയുടെ നേതൃത്വത്തിലുള്ള ശിവസേന (യുബിടി) യിലും പിളർപ്പ് സംബന്ധിച്ച റിപ്പോർട്ടുകൾ ഉയരുന്നതിനിടെയാണ് എസ്പിയെ ചുറ്റിപ്പറ്റിയുള്ള പുതിയ രാഷ്ട്രീയ ചർച്ചകൾ ശക്തമാകുന്നത്.
ലോക്സഭയിൽ 37 എംപിമാരുള്ള സമാജ്വാദി പാർട്ടി പ്രതിപക്ഷ നിരയിലെ പ്രധാന ശക്തികളിലൊന്നാണ്. അതിനാൽ പാർട്ടിയിൽ പിളർപ്പുണ്ടാകുമെന്ന അവകാശവാദം ദേശീയ രാഷ്ട്രീയത്തിലും വലിയ ചർച്ചകൾക്ക് വഴിവെച്ചിരിക്കുകയാണ്.
