ന്യൂഡൽഹി: തമിഴ്നാട്ടിൽ ഗോവധം നിരോധിച്ചുകൊണ്ടുള്ള മദ്രാസ് ഹൈക്കോടതി ഉത്തരവ് സുപ്രീം കോടതി സ്റ്റേ ചെയ്തു. ജസ്റ്റിസ് വിക്രം നാഥ്, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ചാണ് ഇടക്കാല ഉത്തരവ് പുറപ്പെടുവിച്ചത്. മദ്രാസ് ഹൈക്കോടതിയുടെ ഉത്തരവിനെ ചോദ്യം ചെയ്ത് തമിഴ്നാട് സർക്കാർ നൽകിയ ഹർജിയിലാണ് സുപ്രീം കോടതി നടപടി. ഹൈക്കോടതി ഉത്തരവിൽ തിരുത്തൽ ആവശ്യമുണ്ടെന്നും കോടതി നിരീക്ഷിച്ചു.
ബക്രീദ് ദിനത്തിലോ മറ്റ് ദിവസങ്ങളിലോ സംസ്ഥാനത്ത് പശുക്കളെയും പശുക്കിടാക്കളെയും അറക്കുന്നത് തടയണമെന്ന് മദ്രാസ് ഹൈക്കോടതി നേരത്തെ നിർദേശിച്ചിരുന്നു. പാൽ ഉൽപ്പാദനം സംരക്ഷിക്കുന്നതിനും ഗ്രാമീണ സമ്പദ്വ്യവസ്ഥ ശക്തിപ്പെടുത്തുന്നതിനുമാണ് നിരോധനം ഏർപ്പെടുത്തിയതെന്നാണ് ഹൈക്കോടതി വ്യക്തമാക്കിയിരുന്നത്.
1976ലെ സർക്കാർ ഉത്തരവ് അടിസ്ഥാനമാക്കിയാണ് മെയ് 27ന് ഹൈക്കോടതി ഗോവധ നിരോധന ഉത്തരവ് പുറപ്പെടുവിച്ചത്. ഭരണഘടനയിലെ 48-ാം അനുച്ഛേദം പശുക്കളെ സംരക്ഷിക്കാൻ നടപടികൾ സ്വീകരിക്കാൻ സംസ്ഥാനങ്ങളോട് നിർദേശിക്കുന്നുണ്ടെന്നും ഹൈക്കോടതി ചൂണ്ടിക്കാട്ടിയിരുന്നു.
എന്നാൽ, തമിഴ്നാട് സർക്കാർ ഈ ഉത്തരവിനെതിരെ സുപ്രീം കോടതിയെ സമീപിച്ചു. പത്ത് വർഷത്തിലധികം പ്രായമുള്ളതും ജോലി ചെയ്യാനോ പ്രജനനത്തിനോ കഴിയില്ലെന്ന് സർട്ടിഫിക്കറ്റ് ലഭിച്ചതുമായ കന്നുകാലികളെ വധിക്കാൻ സംസ്ഥാന നിയമം അനുമതി നൽകുന്നുണ്ടെന്ന് സർക്കാർ വാദിച്ചു.
നിലവിലെ നിയമ വ്യവസ്ഥകൾക്ക് വിരുദ്ധമാണ് ഹൈക്കോടതി ഉത്തരവെന്നും ചില വിഭാഗത്തിലുള്ള കന്നുകാലികളെ നിശ്ചിത സാഹചര്യങ്ങളിൽ അറക്കാൻ നിയമം അനുവദിക്കുന്നുണ്ടെന്നും തമിഴ്നാട് സർക്കാർ കോടതിയിൽ അറിയിച്ചു. ഇതിന്റെ അടിസ്ഥാനത്തിലാണ് സുപ്രീം കോടതി ഹൈക്കോടതി ഉത്തരവ് സ്റ്റേ ചെയ്തത്.
