വേനലെന്നോ മഴയെന്നോ വ്യത്യാസമില്ലാതെ സംസ്ഥാനത്ത്‌ വന്യജീവി ആക്രമണങ്ങൾ തുടരുകയാണ്. ​​പാലക്കാടും മലപ്പുറത്തും വയനാടും പലയിടങ്ങളിലുമായി കാട്ടാന ആക്രമണങ്ങൾ കഴിഞ്ഞ ദിവസങ്ങളായി റിപ്പോർട്ട് ചെയ്യപ്പെട്ടു. സൂര്യനെല്ലി സിങ്കുകണ്ടത്ത്‌ മക്കളുടെ മുന്നിൽ മാരി എന്ന യുവതിയെ കാട്ടാന ചവിട്ടി കൊലപ്പെടുത്തിയതിന്റെ നടുക്കം ഇനിയും വിട്ടുമാറിയിട്ടില്ല. മൂന്നാഴ്‌ചയ്‌ക്കുള്ളിൽ അഞ്ചുപേരാണ്‌ സംസ്ഥാനത്ത്‌ കാട്ടാനയുടെ ചവിട്ടേറ്റു മരിച്ചത്‌. വന്യജീവി ആക്രമണങ്ങൾ തുടർകഥയാകുമ്പോൾ വനംമന്ത്രിയുടെ പരിഹാസമാണ്‌ കഴിഞ്ഞദിവസം കേരളം കണ്ടത്‌. ‘മന്ത്രിസഭ മാറിയതറിഞ്ഞ്‌ ആനയിറങ്ങിയതാണോ എന്നറിയില്ല’, ‘മുഖ്യമന്ത്രിയും മന്ത്രിയും മാത്രമേ മാറിയിട്ടുള്ളൂ. ഉദ്യോഗസ്ഥരും ആനയും മാറിയിട്ടില്ല’, […]