വാഷിങ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപ് ഹോർമുസ് കടലിടുക്കിൽ കപ്പൽ ഉപരോധം ഏർപ്പെടുത്താനൊരുങ്ങുന്നു എന്ന് റിപ്പോർട്ട്. അനധികൃതമായി ടോൾ നൽകുന്ന കപ്പലുകളെയാണ് അദ്ദേഹം ലക്ഷ്യംവെക്കുന്നതെന്നും, പ്രത്യേകിച്ച് ചൈനീസ് യുവാൻ ഉപയോഗിക്കുന്ന കപ്പലുകളെയാണ് പ്രധാനമായും നിരീക്ഷിക്കുന്നതെന്നും ട്രംപ് സോഷ്യൽ മീഡിയയിലൂടെ അറിയിച്ചു.
ഇന്ത്യ, യുഎസ്, ചൈന, യൂറോപ്പ് തുടങ്ങിയ രാജ്യങ്ങളിൽ വ്യാപാര ബന്ധങ്ങൾ തകർന്നുകൊണ്ടിരിക്കുകയാണ്. ഹോർമുസ് കടലിടുക്കിൽ തടസ്സങ്ങൾ കാരണം ക്രൂഡ് ഓയിൽ വില ബാരലിന് 140 ഡോളറിന് മുകളിൽ എത്തി. എണ്ണക്കൊപ്പം വളം, അലുമിനിയം, പ്ലാസ്റ്റിക്, ഭക്ഷ്യവസ്തുക്കളുടെ വിലയും വർധിച്ചു. സൗദി അറേബ്യയിലെ ചില കെമിക്കൽ പ്ലാന്റുകൾക്ക് ഇറാന്റെ മിസൈൽ ആക്രമണത്തിൽ കേടുപാടുകൾ സംഭവിച്ചതും ചില സാധനങ്ങളുടെ വില കൂടാനുള്ള കാരണമായി മാറി.
ഹോർമുസ് കടലിടുക്കിലെ സംഘർഷം നീണ്ടുനിൽക്കുന്നത് ലോകമെമ്പാടും ഭക്ഷ്യക്ഷാമത്തിനും സാമ്പത്തിക മാന്ദ്യത്തിനും വഴിവയ്ക്കും. ലോകം ഇനി കൂടുതൽ ബഹുധ്രുവ സാമ്പത്തിക ക്രമത്തിലേക്ക് മാറിക്കൊണ്ടിരിക്കുകയാണ്. ചില രാജ്യങ്ങൾ പുനരുപയോഗ ഊർജ്ജത്തിൽ നിക്ഷേപം വർദ്ധിപ്പിച്ചുകൊണ്ടിരിക്കുമ്പോൾ, ഗൾഫ് രാജ്യങ്ങൾ പുതിയ പൈപ്പ് ലൈനുകൾ നിർമ്മിക്കുന്നതിൽ മുന്നേറുകയാണ്.
