തിരുവനന്തപുരം: ലൈംഗികആരോപണക്കേസില് നടപടി നേരിടുന്ന എംഎല്എയും മുന് യൂത്ത് കോണ്ഗ്രസ്സ് നേതാവുമായ രാഹുല് മാങ്കൂട്ടം ഇപ്പോള് തങ്ങളുടെ ഭാഗമല്ലെന്ന് പറഞ്ഞ് പ്രതിപക്ഷനേതാവ് വിഡി സതീശന്. തങ്ങളുടെ ബോധ്യത്തില് നിന്നാണ് രാഹുലിനെതിരെ നടപടിയെടുത്തതെന്നും അദ്ദേഹം പറഞ്ഞു. പൊതുസമൂഹത്തിന് മുന്നില് വലിയ മാതൃകയാണ് കോണ്ഗ്രസ് കാട്ടിയത്. അതിനാല് തലയുയര്ത്തിപ്പിടിച്ചുതന്നെ നിയമസഭയില് യുഡിഎഫ് നില്ക്കും. റേപ്പ് കേസിലെ പ്രതികളുളളത് പ്രതിപക്ഷത്തല്ല, ഭരണപക്ഷത്താണെന്നും വിഡി സതീശന് പറഞ്ഞു.
രാഹുല് സംഭവത്തില് വലിയ വിഷമമുണ്ടെന്ന് പറഞ്ഞ വിഡി സതീശന് കൂട്ടത്തിലൊരാള്ക്ക് ഇത്തരത്തില് സംഭവിച്ചത് സന്തോഷകരമല്ലെന്നും വിശദീകരിച്ചു. എന്നാല് പാര്ട്ടി നടപടി ഒറ്റക്കെട്ടായി എടുത്തതാണ്. നടപടിയുടെ ഉത്തരവാദി താന് മാത്രമെന്ന് ആരെങ്കിലും പറയുന്നെങ്കില് താനത് ഏറ്റെടുക്കുന്നുവെന്നും പ്രതിപക്ഷ നേതാവ് പറഞ്ഞു. രാഹുല് മാങ്കൂട്ടത്തില് വിഷയത്തില് നിലപാടില് നിന്ന് പിന്നോട്ടില്ലെന്ന് സതീശന് ആവര്ത്തിച്ച് വ്യക്തമാക്കി. ആരുടെയും പിന്തുണ പ്രതീക്ഷിച്ചല്ല താന് നിലപാടെടുക്കുന്നത്. ഒരുകാലത്ത് കോണ്ഗ്രസില് ഏറ്റവും അധികം ഒതുക്കപ്പെട്ടയാളാണ് താനെന്നും ഇതറിയാവുന്നത് കൊണ്ടാണ് കഴിവുളള ചെറുപ്പക്കാരെ പിന്തുണയ്ക്കുന്നതെന്നും വി ഡി സതീശന് പറഞ്ഞു.
