തിരുവനന്തപുരം: എക്സാലോജിക്-സി.എം.ആർ.എൽ. കേസുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് നടത്തുന്ന റെയ്ഡിനെക്കുറിച്ച് കേരള പോലീസിനോ ആഭ്യന്തര വകുപ്പിനോ മുൻകൂർ വിവരം ലഭിച്ചിരുന്നില്ലെന്ന് ആഭ്യന്തര മന്ത്രി രമേശ് ചെന്നിത്തല. റെയ്ഡുമായി ബന്ധപ്പെട്ട് സംസ്ഥാന സർക്കാരിന് യാതൊരു അറിയിപ്പും ലഭിച്ചിട്ടില്ലെന്നും അദ്ദേഹം പറഞ്ഞു.
മുഖ്യമന്ത്രിയായി ചുമതലയേറ്റതിന് പിന്നാലെ വി.ഡി. സതീശൻ ഡൽഹിയിൽ പ്രധാനമന്ത്രി നരേന്ദ്ര മോദിയെ കണ്ടത് കേരളത്തിന്റെ ആവശ്യങ്ങൾ ഉന്നയിക്കാനായിരുന്നുവെന്നും അത് സർക്കാർ നടപടികളുടെ ഭാഗമാണെന്നും ചെന്നിത്തല വ്യക്തമാക്കി. ഇ.ഡി. അന്വേഷണവുമായി ആ സന്ദർശനത്തിന് ബന്ധമില്ലെന്നും അദ്ദേഹം പറഞ്ഞു.
ഇ.ഡി. നടപടിയെ വി.ഡി. സതീശന്റെ ഡൽഹി യാത്രയുമായി ബന്ധിപ്പിക്കുന്നത് രാഷ്ട്രീയ ലക്ഷ്യത്തോടെയാണെന്നും അദ്ദേഹം വിമർശിച്ചു. റെയ്ഡിനായി കേരള പോലീസിനോടോ ആഭ്യന്തര വകുപ്പിനോടോ സഹായം തേടിയിട്ടില്ലെന്നും കേന്ദ്രസേനകളുടെ സഹായമാണ് ഇ.ഡി. ഉപയോഗിച്ചതെന്നും ചെന്നിത്തല പറഞ്ഞു. ഡി.ജി.പി.യുമായും ഹോം സെക്രട്ടറിയുമായും സംസാരിച്ചപ്പോഴും റെയ്ഡിനെക്കുറിച്ച് അവർക്കും മുൻകൂർ വിവരം ഉണ്ടായിരുന്നില്ലെന്നാണ് വ്യക്തമാക്കിയതെന്നും അദ്ദേഹം കൂട്ടിച്ചേർത്തു.
കോൺഗ്രസും ബി.ജെ.പി.യും തമ്മിൽ ധാരണയുണ്ടെന്ന ആരോപണം പഴയ രാഷ്ട്രീയ പ്രചാരണമാണെന്നും ചെന്നിത്തല പറഞ്ഞു. കോൺഗ്രസും ബി.ജെ.പി.യും സി.പി.എം.വും എന്താണെന്ന് ജനങ്ങൾക്കറിയാമെന്നും സി.പി.എം.-ബി.ജെ.പി. ബന്ധത്തെക്കുറിച്ച് ജനങ്ങളോട് വിശദീകരിക്കേണ്ട ബാധ്യത ഇടതുപക്ഷത്തിനാണെന്നും അദ്ദേഹം വിമർശിച്ചു.
