തൃശൂർ: മുതിർന്ന കോൺഗ്രസ് നേതാവും മുൻ ചാലക്കുടി എംപിയുമായിരുന്ന കെ.പി. ധനപാലൻ (76) അന്തരിച്ചു. കുറച്ചുനാളുകളായി അസുഖബാധിതനായി ചികിത്സയിലായിരുന്നു. കോൺഗ്രസിന്റെ പ്രമുഖ നേതാക്കളിലൊരാളായ ധനപാലൻ എറണാകുളം ജില്ലാ കോൺഗ്രസ് കമ്മിറ്റി (ഡിസിസി) പ്രസിഡന്റായും പ്രവർത്തിച്ചിട്ടുണ്ട്. 1979-ൽ പറവൂർ നഗരസഭാംഗമായി തിരഞ്ഞെടുക്കപ്പെട്ടതോടെയാണ് അദ്ദേഹം പൊതുപ്രവർത്തനത്തിലും തിരഞ്ഞെടുപ്പ് രാഷ്ട്രീയത്തിലും സജീവമായത്. ഞായറാഴ്ച പറവൂരിൽ പ്രതിപക്ഷ നേതാവ് വി.ഡി. സതീശന് നൽകിയ സ്വീകരണ പരിപാടിയിലായിരുന്നു ധനപാലൻ അവസാനമായി പൊതുവേദിയിൽ പങ്കെടുത്തത്. അദ്ദേഹത്തിന്റെ നിര്യാണം കോൺഗ്രസ് പ്രവർത്തകർക്കും രാഷ്ട്രീയലോകത്തിനും വലിയ നഷ്ടമായി.

തൃശ്ശൂർ: അതിരപ്പിള്ളി വൈശേരിയിൽ കാട്ടാനയുടെ ആക്രമണത്തിൽ 65കാരൻ മരിച്ചു. പുല്ലേർകാട്ട് സ്വദേശിയായ മോഹനൻ (65) ആണ് ദാരുണമായി കൊല്ലപ്പെട്ടത്. ഇന്ന് പുലർച്ചെ രണ്ടരയോടെയായിരുന്നു സംഭവം. സമീപ പ്രദേശത്ത് കാട്ടാന ഇറങ്ങിയ വിവരം അറിഞ്ഞ് പുറത്തിറങ്ങിയ മോഹനൻ ആനയുടെ മുന്നിൽപ്പെടുകയായിരുന്നു. ആക്രമണത്തിൽ ഗുരുതരമായി പരിക്കേറ്റ അദ്ദേഹത്തെ ചാലക്കുടിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.